استانا اۋەجايىنىڭ بۇرىنعى قىزمەتكەرلەرى 27 مىڭ دوللارعا جۋىق اقشانى ۇرلادى دەگەن كۇدىككە ءىلىندى، دەپ حابارلايدى "ادىرنا" ۇلتتىق پورتالى كولىك پوليتسياسى باسقارماسىنىڭ ءباسپاسوز قىزمەتىنە سىلتەپ.
«كولىك پوليتسياسى قىزمەتكەرلەرى كولىك پروكۋراتۋراسىمەن بىرلەسىپ جۇرگىزگەن جەدەل-ىزدەستىرۋ ءىس-شارالارىنىڭ ناتيجەسىندە اتالعان قىلمىستاردى جاسادى دەگەن كۇدىكپەن اۋە ايلاعىندا جۇك تيەۋشى بولىپ جۇمىس ىستەگەن التى ادامنان تۇراتىن توپ ۇستالدى»، - دەلىنگەن حابارلامادا.
تامىز ايىندا استانا-ستامبۋل رەيسىنىڭ جولاۋشىسى چەمودانىنان 19 مىڭ دوللار جوعالتسا، استانا-دۋباي رەيسىنىڭ جولاۋشىسى دا 7800 دوللارىنان ايىرىلعانىن مالىمدەگەن.
كولىكتەگى پوليتسيا دەپارتامەنتى سوڭعى ۋاقىتتا استانا اۋەجايىندا قولما-قول اقشانى، التىن بۇيىمداردى جانە باسقا دا قۇندى زاتتاردى ۇرلاۋمەن چەمودانداردى رۇقساتسىز اشۋ فاكتىلەرى جيىلەپ كەتكەنىن اتاپ ءوتتى.
«ۇستالعاندار كىنالارىن مويىندادى، اقشانىڭ ءبىر بولىگى تاركىلەنىپ، يەلەرىنە قايتارىلدى. قازىرگى ۋاقىتتا قاجەتتى تەرگەۋ امالدارى جۇرگىزىلىپ، كۇدىكتىلەردىڭ وسىعان ۇقساس باسقا دا قىلمىستارعا قاتىسى بار-جوعى تەكسەرىلۋدە»، - دەلىنگەن حابارلامادا.
