شىعىس قازاقستان وبلىسىنىڭ اكىمى دانيال احمەتوۆ سەمەي قالاسىنا جاساعان جۇمىس ساپارى بارىسىندا ۇلى وتان سوعىسى ارداگەرلەرىنە قوناققا باردى. ولاردىڭ اراسىندا دميتري ليتۆينەنكو مەن قۇمار ومىرباەۆ بار. ءوڭىر باسشىسى مايدانگەرلەردى كەلە جاتقان جەڭىس كۇنىمەن قۇتتىقتاپ، ولارعا زور دەنساۋلىق، باقىت جانە ۇزاق ءومىر تىلەدى.
دميتري لازارەۆيچ اكىمگە 1943 جىلدىڭ قازان ايىندا اسكەر قاتارىنا قابىلدانعانىن ايتتى. جاس جاۋىنگەر كۋرسىن وتكەننەن كەيىن تاشكەنتكە راديوتەلەگرافيستەر كۋرسىنا جىبەرىلدى. 1945 جىلدىڭ اقپان ايىندا بەلورۋس مايدانىنا جىبەرىلىپ، اۋە اسكەرىنىڭ قۇرامىندا شىعىس پرۋسسياسىنىڭ بەكىتىلگەن استاناسى كەنيگسبەرگ بەكىنىسىنە شابۋىل جاسادى.
ال 1941 جىلى اسكەرگە شاقىرىلعان قۇمار ومىرباەۆ 2-ءشى ۋكراين مايدانىنىڭ قۇرامىندا سوعىسىپ، كيروۆوگراد، كريۋكوۆ، كرەمەنششۋك جانە حاركوۆ قالالارىن ازات ەتۋگە قاتىسقان. حاركوۆتى بوساتۋ بويىنشا شايقاستاردىڭ بىرىندە اۋىر جارالانىپ، تۋعان كولحوزىنا بريگادير، سودان كەيىن بورودۋليحا اۋدانىنىڭ "كوروستىلەۆو" كولحوزىندا باسقارۋشى بولىپ جۇمىس ىستەدى.
اكىممەن اڭگىمە بارىسىندا ارداگەرلەر دانيال احمەتوۆكە ءوز گراموتالارى مەن فوتوسۋرەتتەرىن كورسەتىپ، ەستەلىكتەرىمەن ءبولىستى. مايدانگەرلەرگە شەكسىز العىس بىلدىرگەن ايماق باسشىسى، ولاردى جەڭىس كۇنىمەن قۇتتىقتاپ، اقشالاي سەرتيفيكاتتار مەن تەلەديدارلار تابىس ەتتى.
