قازاق كولىك جانە كوممۋنيكاتسيا اكادەمياسىن قوقان-لوقىمەن تارتىپ الۋ ارەكەتى ورىن الىپ جاتقانى ايتىلدى، دەپ حابارلايدى "ادىرنا" ءتىلشىسى جۋرناليست گۇلميرا ابىقايدىڭ جەلىدەگى جازباسىنا سىلتەمە جاساپ.
قازاق كولىك جانە كوممۋنيكاتسيا اكادەمياسىن نۇرلان ساۋرانباەۆ ەسىمدى شەنەۋنىك كۇشتەپ الماق بولعان. بۇل تۋرالى اكادەميانىڭ ينۆەستورى ءارى باسشىسى گۇلزانا سەرىكوۆا ۇندەۋ جولداپ، دابىل قاعۋدا. بەينە-ۇندەۋدە:
""“مەن سىزدەردەن كومەك سۇراۋعا ءماجبۇرمىن. ماعان شەنەۋنىكتەن قىسىم ءتۇسىپ جاتىر. مەندە حابارلامالار، قوىڭراۋلار، كەزدەسۋدە ايتىلعان جازبالار، دالەلدەر بار. مەن ءبارىن كورسەتە الامىن. جىل باسىندا "قازاقستان تەمىر جولىنىڭ" باسشىسى نۇرلان ساۋرانباەۆ مەنى ءوز كەڭسەسىنە شاقىرىپ، قورقىتا باستادى. ول اكادەميانىڭ 51% ونىڭ ايتقان ادامىنا جازۋىمدى ايتتى. ايتقانىمدى ىستەمەسەڭ، اباقتىعا وتىرعىزىپ، جەكە بيزنەسىڭدى تارتىپ الامىن. سەن مەنىڭ مۇمكىندىكتەرىمدى بىلمەيسىڭ",-دەپ قورقىتقانىن ايتادى.
ۇسىنىستان باس تارتقان كاسىپكەر گۇلزاناعا ۇلتتىق كومپانيا توراعاسى «51 ەمەس، 25 پايىزىن بەر، ساعان مەنىڭ اتىمنان ءبىر كىسى حابارلاسادى» دەگەن-مىس.
سايكەسىنشە وعان ج. ەسىمدى بويجەتكەن حابارلاسىپ، شەنەۋنىكتىڭ قىزى ەكەنىن ايتقان. ياعني، قتج باسشىسىنىڭ قىزى حابارلاسىپ، «پاپام سۇراپ جاتىر، اكتسيالاردى قاشان بەرەسىڭ» دەگەن سىندى ساۋال قويعان.
تانىمال جۋرناليست گۇلميرا ابىقاي بۇل داۋعا قاتىستى ارنايى تەكسەرۋ جۇمىستارى ءجۇرىپ جاتقانىن ايتادى. ءوز جازباسىندا:
"كەزىندە مەملەكەت قاراماعىندا بولعان ايگىلى وقۋ ورنى توزىعى جەتىپ، جەمقورلىققا ابدەن باتتى. بيۋدجەتكە ءتيىمسىز اكتيۆ دەپ تانىلعان مەكەمەنى ۇكىمەت جەكەشەلەندىرۋگە شىعارادى. اۋكتسيون قورىتىندىسى بويىنشا ساتىلدى. گۇلزانا حانىم قازاتك-عا 5 جىلدا اتتاي 4 ملرد. تگ. اسا قارجى قۇيىپتى. ەندى عانا اياعىنا تۇرىپ كەلە جاتقان وقۋ ورنىن قتج باسشىسىنىڭ كەرى قايتارۋ ءۇشىن اشىق بوپسالاۋىنىڭ استارىندا نە جاتىر؟ ۇلتتىق كومپانيا باسقارما توراعاسىنىڭ ەركەتوتاي قىزى بۇل مەكەمەنىڭ ەنشىلەس تۇلعاسى (افيلليروۆاننوە ليتسو) ەكەنى تاعى انىق. مىنا بەينە ۇندەۋ 90-شى جىلدارداعى وقيعالاردى ەلەستەتەدى. رەيدەرلىك بوپسالاۋ دەگەن اليەۆپەن بىرگە كەتتى ما دەسەك بار ەكەن عوي)",-دەپ جازادى.
