باس پروكۋراتۋرا سايلاۋ بويىنشا ازاماتتارعا ەسكەرتۋ جاسادى
الماتى قالاسى مەن الماتى وبلىسىنىڭ ەكى تۇرعىنى الەۋمەتتىك جەلىلەردە سايلاۋعا قاتىستى ساۋالناما جۇرگىزگەنى ءۇشىن اكىمشىلىك جاۋاپكەرشىلىككە تارتىلدى، دەپ حابارلايدى باس پروكۋراتۋرانىڭ ءباسپاسوز قىزمەتى
"قازاقستاننىڭ باس پروكۋراتۋراسى ەل پرەزيدەنتىنىڭ كەزەكتەن تىس سايلاۋى بارىسىندا زاڭدى بۇزباۋدى، ونىڭ ىشىندە كونستيتۋتسيانىڭ "قازاقستان رەسپۋبليكاسىنداعى سايلاۋ تۋرالى" زاڭىندا كوزدەلگەن قوعامدىق پىكىرگە ساۋال سالۋ شارتتارىنىڭ ساقتالۋىن ەرەكشە باقىلاۋدا ۇستايدى", - دەلىنگەن رەسمي حابارلامادا.
ينتەرنەتتە وسى زاڭنىڭ تالاپتارى بۇزىلعانى تىركەلدى. اتاپ ايتقاندا، Nur.kz ينتەرنەت رەسۋرسىنىڭ مەنشىك يەسى ورتالىق سايلاۋ كوميسسياسىنا ەسكەرتپەي ساۋالناما جۇرگىزدى. سونداي-اق، الەۋمەتتىك جەلىلەردە دە وسىنداي ساۋالنامالار جۇرگىزىلىپتى. وسى دەرەكتەر بويىنشا قۇقىق بۇزۋشىلار اكىمشىلىك جاۋاپكەرشىلىككە تارتىلدى.
ماسەلەن، "ۆكونتاكتە" الەۋمەتتىك جەلىسىندە سايلاۋ اياسىندا قوعامدىق پىكىرگە ساۋالناما جۇرگىزگەن الماتى قالاسىنىڭ تۇرعىنى جاۋاپقا تارتىلدى. وعان اكىمشىلىك قۇقىق بۇزۋشىلىق كودەكسىنىڭ 120-بابى، 3-تارماعىنا سايكەس 15 اەك (37 875 تەڭگە) كولەمىندە ايىپپۇل سالىندى. سول سياقتى Facebook جەلىسىندە جاسالعان قۇقىق بۇزۋشىلىق ءۇشىن الماتى وبلىسىنىڭ تۇرعىنى اكىمشىلىك جاۋاپكەرشىلىككە تارتىلعان.
"باس پروكۋراتۋرا ازاماتتارعا سايلاۋ پروتسەسى بارىسىندا زاڭدى ساقتاۋ قاجەتتىگىن جانە سايلاۋعا بايلانىستى ساۋالناما جۇرگىزۋ شارتتارىن بۇزعانى ءۇشىن اكىمشىلىك قۇقىق بۇزۋشىلىق تۋرالى كودەكستىڭ 120-بابىنا سايكەس جاۋاپكەرشىلىككە تارتىلاتىنىن ەسكە سالادى. بۇل رەتتە ازاماتتارعا مۇقيات بولىپ، الەۋمەتتىك جەلىلەردەگى جەكە اككاۋنتتارىن باسقا بىرەۋلەردىڭ پايدالانۋىنا جول بەرمەۋى قاجەت", - دەيدى پروكۋرورلار.
"ادىرنا" ۇلتتىق پورتالى
