قازاقستان ءباا-ءنىڭ Terminals Holding كومپانياسىمەن ۇشۋ-قونۋ جولاعىن رەكونسترۋكتسيالاۋ مەن جاڭعىرتۋعا دايىندايتىن كەلىسىمگە قول قويدى، سودان كەيىن استانا اۋەجايىن جەدەل باسقارۋ وعان بەرىلەدى، دەپ حابارلايدى "ادىرنا" پورتالى.
پرەمەر-ءمينيستردىڭ ءباسپاسوز قىزمەتى حابارلاعانداي، ءاليحان سمايىلوۆتىڭ تۇركىستان وبلىسىنا جۇمىس ساپارى بارىسىندا استانا اۋەجايىن مۋلتيمودالدى حاب رەتىندە دامىتۋ بويىنشا ىنتىماقتاستىق تۋرالى كەلىسىمگە قول قويىلدى.
«ينۆەستور ەلوردا اۋەجايىنىڭ قىزمەتىنە كەشەندى باعا بەرىپ، كەيىننەن جولاۋشىلارعا قىزمەت كورسەتۋ ساپاسىن جانە تۇتاستاي العاندا اۋە ايلاعىنىڭ تيىمدىلىگىن ارتتىرۋ بويىنشا جەدەل باسقارۋدى ءوز قولىنا الادى»، - دەپ اتاپ ءوتتى ءباسپاسوز قىزمەتى.
سونداي-اق، دايىندىق جۇمىستارى مەن ەلوردانىڭ قىسقا قۇرىلىس ماۋسىمىن ەسكەرە وتىرىپ، كەلەسى جىلى جەرۇستى ينفراقۇرىلىمىن قايتا جاڭعىرتۋدى باستاۋ جوسپارلانىپ وتىرعانى ايتىلدى.
وسىمەن قاتار مەملەكەت پەن جەكە كومپانيانىڭ مۇددەلەرىنىڭ تەڭگەرىمىن ەسكەرە وتىرىپ، اۋەجايدى دامىتۋدىڭ ۇزاق مەرزىمدى بيزنەس-جوسپارى ازىرلەنەدى، ول بولاشاق ينۆەستيتسيالارعا نەگىز بولادى.
