قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ نازارىنا
قازاق اتتان جىعىلسا دا، سالتتان جىعىلمايتىن ەلدىڭ بالاسى ەدى. دۇنيەگە ۇل بالا كەلسە ات ۇستار كەلدى دەپ، ۇلى ەر جەتكەندە ات جالىن تارتىپ ءمىندى دەيتىن دە قازاق. ەل باسقارعان ۇلدارىن اتقا مىنەر دەگەن تەڭەۋ دە قازەكەڭنەن قالعان. قازاق ءۇشىن اتقا ءمىنۋ ول ۇلكەن قۇرمەت، بيلىك. اۋىلىنىڭ اتاعىن شىعارعان ۇلدارىنا ات مىنگىزىپ، شاپان جابۋ ول اتانىڭ جولى، بابانىڭ ءداستۇرى بولاتىن. اقىن قادىر مىرزا-ءالى قازاقتىڭ وسى تاماشا ءداستۇرىن
قازاق وسى اشىق-جارقىن قاباعى،
قوناق كەلسە جادىراپ ءبىر قالادى.
قارادا تۇر ساعان دا ول كەتەردە،
ات مىنگىزىپ، جىبەك شاپان جابادى دەپ ءبىر-اق شۋماق ولەڭگە سىيعىزعان. قازىرگى بيلىكتەگىلەردىڭ قادىردىڭ وسى ولەڭىن وقىماعانى وكىنىشتى.
سوڭعى كەزدە الەۋمەتتىك جەلىدە اتىراۋ وبلىستىق ىشكى ىستەر دەپارتامەنتىنىڭ باستىعى ايان دۇيسەمباەۆتىڭ اتقا مىنگەن ءساتى تۇسىرىلگەن ۆيدەوسى كەڭىنەن تارادى. وعان سەبەپ، 6 مامىردا پرەزيدەنت قاسىم-جومارت توقاەۆ نۇر-سۇلتاندا ايان دۇيسەمباەۆقا گەنەرال-مايور شەنىن تاپسىرعان بولاتىن. اۋىل تۇرماق، وبلىستىڭ وزىنەن شىققان گەنەرال-مايور ساۋساقپەن سانارلىق. ۇلدارىنىڭ مۇنداي ماراپاتقا يە بولعانىنا قۋانعان جەرلەستەرى اتىراۋ وبلىسى، قىزىلقوعا اۋدانى، ميالى اۋىلى ايان ءسابيتۇلىن اۋىلعا كەزدەسۋگە شاقىرعان. اۋىلداستارىمەن كەزدەسۋدەن كەيىن ەسىك الدىنا شىققان سىيلى قوناققا اۋىلداس اعاسى بەلگىلى رەجيسسەر ساعيدوللا ياكۋپوۆ ەلدىڭ اتىنان دەپ، ەر-تۇرمانىمەن اتتى كولدەنەڭ تارتادى. ساعيدوللا اعامىزدىڭ رايىمبەك ەسىمدى مۇگەدەك بالاسى بار ەكەن. ەكى اياعىنان جۇرە الماسا دا، سپورتپەن اينالىسىپ، ايان اعامىز سياقتى سپورتشى بولامىن دەپ ارمانداعان رايىمبەكتىڭ ومىرگە دەگەن قۇلشىنىسى كەرەمەت. ساعيدوللا ياكۋپوۆ سول بالام سەن سەكىلدى ازامات بولىپ، اياققا تۇرىپ كەتسىن، حالىقتىڭ باتاسى ەم بولسىن دەپ ىرىمداعان ەكەن. گەنەرال دۇيسەمباەۆ جىلقىعا مىنۋدەن باس تارتىپ، ماعان سىيلىق الۋعا بولمايدى دەگەن. اقساقالداردىڭ ءسوزىن جەرگە تاستاي الماي ەكى مينۋتتاي اتقا ءمىنىپ، سول جەردە ساعيدوللا اعامىزدىڭ مۇگەدەك بالاسىنا ءوز قولىمەن جىلقىنى سىيلاپ كەتىپتى. بۇنىڭ ءوزى ازاماتتىڭ ءجون بىلەتىنىن كورسەتسە كەرەك.
ءبىز ايان دۇيسەمباەۆ جايلى اقپارات جيناۋ بارىسىندا ءومىربايانىنا كوز جۇگىرتتىك.
دۇيسەنباەۆ ايان ءسابيتۇلى 1966 جىلى 12 قاڭتاردا اتىراۋ وبلىسى، قىزىلقوعا اۋدانى، مۇقىر اۋىلىندا جاس دارىگەر مەن مۇعالىم وتباسىندا دۇنيەگە كەلدى. اكەسى ءسابيت دۇيسەنبايۇلى - دارىگەر، اناسى باقتىلى مۇساعاليقىزى - "قازاق ءتىلى مەن ادەبيەتى" ءپانىنىڭ مۇعالىمى. اياننىڭ اكەسى ءسابيت 1969 جىلى ميالى سەلوسىندا قايتىس بولدى. ول كەزدە ايان 3 جاستا بولعان. اناسى باقتىلى مۇساعاليقىزى قىزى الماجايدى، ۇلدارى ابزال مەن اياندى ءوزى تاربيەلەپ ءوسىردى. ايان ءسابيتۇلى 1973-1983 جىلدارى سول كەزدەگى كرۋپسكايا، قازىرگى حالەل دوسمۇحاممەدۇلى اتىنداعى ورتا مەكتەپتە وقىپ ءبىلىم الدى. 1984-1986 جىلدارى وتان الدىنداعى بورىشىن وتەپ كەلدى.
1991 جىلى قازاق دەنە شىنىقتىرۋ ينستيتۋتىن، 2000 جىلى ءال-فارابي اتىنداعى قازاق مەملەكەتتىك ۋنيۆەرسيتەتىن اياقتادى. ماماندىعى - ۇستاز، زاڭگەر. ايان ءسابيتۇلىنىڭ ىشكى ىستەر ورگاندارىنداعى قىزمەتى 1999 جىلى باستالدى.
1999 جىلدىڭ تامىز ايىنان قىركۇيەك ايى ارالىعىندا ىشكى ىستەر مينيسترلىگىنىڭ دايىندىق مەكتەبىندە وقىدى. 1999 جىلدىڭ قىركۇيەك ايىنان 2001 جىلدىڭ قاڭتار ايى ارالىعىندا الماتى قالاسىندا ۇيىمداسقان قىلمىسقا قارسى كۇرەس باسقارماسىندا جەدەل ۋاكىل بولىپ جۇمىس ىستەدى.
2001 جىلدىڭ قاڭتار ايىنان 2003 جىلدىڭ ناۋرىز ايى ارالىعىندا الماتى قالالىق ىشكى ىستەر باسقارماسىندا اعا جەدەل ۋاكىل قىزمەتىن اتقارعان. 2003 جىلدىڭ ناۋرىز ايىنان تامىز ايى ارالىعىندا اتىراۋ وبلىستىق ىشكى ىستەر باسقارماسىندا ۇيىمداسقان قىلمىسپەن اينالىساتىن توپقا قارسى قىزمەت باسقارماسىندا، 2003 جىلدىڭ تامىز ايىنان 2004 جىلدىڭ قىركۇيەك ايى ارالىعىندا اتىراۋ وبلىسىندا "ارلان" جاساعىنىڭ كومانديرى، 2004 جىلدىڭ قىركۇيەك ايىنان 2005 جىلدىڭ اقپان ايى ارالىعىندا قازاقستان رەسپۋبليكاسىنىڭ ىشكى ىستەر مينيسترلىگىندە قىزمەتتە بولدى. 2005 جىلدىڭ اقپان ايىنان 2006 جىلدىڭ اقپان ايى ارالىعىندا قازاقستان رەسپۋبليكاسى ىشكى ىستەر مينيسترلىگىنىڭ اتىراۋ وبلىسى بويىنشا ارنايى قىزمەتىندە بولدى. 2006 جىلدىڭ اقپان ايىنان 2007 جىلدىڭ قازان ايى ارالىعىندا قازاقستان رەسپۋبليكاسى ىشكى ىستەر مينيسترلىگىنىڭ جەدەل باسقارماسىن باسقاردى.
2007 جىلدىڭ قازان ايىنان 2009 جىلدىڭ شىلدە ايى ارالىعىندا قازاقستان رەسپۋبليكاسىنىڭ ىشكى ىستەر مينيسترلىگىنىڭ الماتى قالاسىنداعى جەدەل باسقارماسىن باسقاردى. 2009 جىلدىڭ شىلدە ايىنان 2012 جىلدىڭ ماۋسىم ايى ارالىعىندا قازاقستان رەسپۋبليكاسىنىڭ ىشكى ىستەر مينيسترلىگىنىڭ ارنايى دەپارتامەنتتەرىن اتىراۋ،الماتى، استانا قالالارىندا باسقاردى.
2012 جىلدىڭ قىركۇيەك ايىنان باستاپ اتىراۋ وبلىستىق ىشكى ىستەر دەپارتامەنتىنىڭ باستىعىنىڭ ءبىرىنشى ورىنباسارى، 2016 جىلدان باستاپ اتىراۋ وبلىستىق ىشكى ىستەر دەپارتامەنتىنىڭ باستىعى. قازىر اتىراۋ وبلىستىق پوليتسيا دەپارتامەنتىنىڭ باستىعى.
دۇيسەنباەۆ ايان ءسابيتۇلى - فيلولوگيا عىلىمدارىنىڭ كانديداتى، مەملەكەتتىك ماراپاتتاردىڭ يەسى. دزيۋدودان سسر-ءدىڭ سپورت شەبەرى، قازاقشا كۇرەستەن قازسسر-ءدىڭ سپورت شەبەرى.
وتباسىلى. جەتى بالانىڭ اكەسى. ەكى ۇلى، بەس قىزى، نەمەرە-جيەندەرى بار.
وسى اقپاراتتىڭ ءوزى ايان دۇيسەمباەۆتىڭ قاتارداعى ۋاكىلدەن باستاپ، گەنەرال-مايورعا دەيىنگى ارالىقتاعى جيىرما جىلدى قالاي ءجۇرىپ وتكەنىنە دالەل بولادى. الەۋمەتتىك جەلىگە اتقا مىنگەن ءساتى جۇكتەلگەننەن باستاپ حالىقتىڭ گەنەرالدى قورعاي سويلەگەنىنەن-اق، ونىڭ ەل اراسىنداعى ابىرويىنىڭ قانشالىقتى ەكەنىنە كوز جەتكىزۋگە بولادى. كوپتەگەن قايىرىمدىلىق شارالارى مەن جەتىم-جەسىرگە قامقور بولعانىن جەرلەستەرى ەندى جازىپ جاتىر. ءوزى ونداي شارالاردى جاريالاۋعا قارسى بولىپتى. ۇكىمەت كوپ بالالى وتباسىلاردىڭ جاعدايىنا كوڭىل بولەمىز دەيدى. كوڭىل بولەتىن بولسا، ايان ءسابيتۇلىن مۇنشالىقتى قاتاڭ جازالامايتىن ەدى. جەتى بالاسى ءۇشىن عانا سوگىس بەرۋگە بولاتىن ەدى.
سايلاۋ الدىندا پرەزيدەنت قاسىم-جومارت توقاەۆ گەنەرال دۇيسەمباەۆقا بايلانىستى شەشىمىن قايتا قاراسا ءبىر وبلىستىڭ عانا ەمەس، بارشا حالىقتىڭ ىقىلاسىنا يە بولار ەدى. ات مىنگىزۋ قازاقتىڭ ەڭ ۇلكەن قۇرمەتى ەكەنىن اسفالتتا وسكەن وزگەلەرگە دە ۇلكەن ناسيحات بولار ەدى.
وڭعار قابدەن
"ادىرنا" ۇلتتىق پورتالى
