"Attan qulaǵan" kim? Prezıdent pe? General ma?

6932
Adyrna.kz Telegram

 Qazaqstan Respýblıkasynyń prezıdenti Qasym-Jomart Toqaevtyń nazaryna

Qazaq attan jyǵylsa da, salttan jyǵylmaıtyn eldiń balasy edi. Dúnıege ul bala kelse at ustar keldi dep, uly er jetkende at jalyn tartyp mindi deıtin de qazaq. El basqarǵan uldaryn atqa miner degen teńeý de qazekeńnen qalǵan. Qazaq úshin atqa miný ol úlken qurmet, bılik.  Aýylynyń ataǵyn shyǵarǵan uldaryna at mingizip, shapan jabý ol atanyń joly, babanyń dástúri bolatyn. Aqyn Qadyr Myrza-Áli qazaqtyń osy tamasha dástúrin

Qazaq osy ashyq-jarqyn qabaǵy,
Qonaq kelse jadyrap bir qalady.
Qarada tur saǵan da ol keterde,
At mingizip, jibek shapan jabady dep bir-aq shýmaq óleńge syıǵyzǵan. Qazirgi bıliktegilerdiń Qadyrdyń osy óleńin oqymaǵany ókinishti.

Sońǵy kezde áleýmettik jelide Atyraý oblystyq Ishki Ister departamentiniń bastyǵy Aıan Dúısembaevtyń atqa mingen sáti túsirilgen vıdeosy keńinen tarady. Oǵan sebep, 6 mamyrda prezıdent Qasym-Jomart Toqaev Nur-Sultanda Aıan Dúısembaevqa general-maıor shenin tapsyrǵan bolatyn. Aýyl turmaq, oblystyń ózinen shyqqan general-maıor saýsaqpen sanarlyq. Uldarynyń mundaı marapatqa ıe bolǵanyna qýanǵan jerlesteri Atyraý oblysy, Qyzylqoǵa aýdany, Mııaly aýyly Aıan Sábıtulyn aýylǵa kezdesýge shaqyrǵan. Aýyldastarymen kezdesýden keıin esik aldyna shyqqan syıly qonaqqa aýyldas aǵasy belgili rejısser Saǵıdolla Iakýpov eldiń atynan dep, er-turmanymen atty kóldeneń tartady. Saǵıdolla aǵamyzdyń Raıymbek esimdi múgedek balasy bar eken. Eki aıaǵynan júre almasa da, sportpen aınalysyp, Aıan aǵamyz sııaqty sportshy bolamyn dep armandaǵan Raıymbektiń ómirge degen qulshynysy keremet. Saǵıdolla Iakýpov sol balam sen sekildi azamat bolyp,  aıaqqa turyp ketsin, halyqtyń batasy em bolsyn dep yrymdaǵan eken. General Dúısembaev jylqyǵa minýden bas tartyp, maǵan syılyq alýǵa bolmaıdy degen. Aqsaqaldardyń sózin jerge tastaı almaı  eki mınýttaı atqa minip, sol jerde Saǵıdolla aǵamyzdyń múgedek balasyna óz qolymen jylqyny  syılap ketipti. Bunyń ózi azamattyń jón biletinin kórsetse kerek.

Biz Aıan Dúısembaev jaıly aqparat jınaý barysynda ómirbaıanyna kóz júgirttik.

Dúısenbaev Aıan Sábıtuly 1966 jyly 12 qańtarda Atyraý oblysy, Qyzylqoǵa aýdany, Muqyr aýylynda jas dáriger men muǵalim otbasynda dúnıege keldi. Ákesi Sábıt Dúısenbaıuly - dáriger, anasy Baqtyly Musaǵalıqyzy - "qazaq tili men ádebıeti" pániniń muǵalimi. Aıannyń  ákesi Sábıt 1969 jyly Mııaly selosynda qaıtys boldy. Ol kezde Aıan 3 jasta bolǵan. Anasy Baqtyly Musaǵalıqyzy qyzy Almajaıdy, uldary Abzal men Aıandy ózi tárbıelep ósirdi. Aıan Sábıtuly 1973-1983 jyldary sol kezdegi Krýpskaıa, qazirgi Halel Dosmuhammeduly atyndaǵy orta mektepte oqyp bilim aldy. 1984-1986 jyldary Otan aldyndaǵy boryshyn ótep keldi.

1991 jyly Qazaq dene shynyqtyrý ınstıtýtyn, 2000 jyly Ál-Farabı atyndaǵy Qazaq Memlekettik Ýnıversıtetin aıaqtady. Mamandyǵy - ustaz, zańger.  Aıan Sábıtulynyń Ishki Ister Organdaryndaǵy qyzmeti 1999 jyly bastaldy.
1999 jyldyń tamyz aıynan qyrkúıek aıy aralyǵynda Ishki Ister Mınıstrliginiń daıyndyq mektebinde oqydy. 1999 jyldyń qyrkúıek aıynan 2001 jyldyń qańtar aıy aralyǵynda Almaty qalasynda uıymdasqan qylmysqa qarsy kúres basqarmasynda jedel ýákil bolyp jumys istedi.

2001 jyldyń qańtar aıynan 2003 jyldyń naýryz aıy aralyǵynda Almaty qalalyq Ishki Ister Basqarmasynda aǵa jedel ýákil qyzmetin atqarǵan. 2003 jyldyń naýryz aıynan tamyz aıy aralyǵynda Atyraý oblystyq Ishki Ister Basqarmasynda uıymdasqan qylmyspen aınalysatyn topqa qarsy qyzmet basqarmasynda, 2003 jyldyń tamyz aıynan 2004 jyldyń qyrkúıek aıy aralyǵynda Atyraý oblysynda "Arlan" jasaǵynyń komandıri, 2004 jyldyń qyrkúıek aıynan 2005 jyldyń aqpan aıy aralyǵynda Qazaqstan Respýblıkasynyń Ishki Ister Mınıstrliginde qyzmette boldy. 2005 jyldyń aqpan aıynan 2006 jyldyń aqpan aıy aralyǵynda Qazaqstan Respýblıkasy Ishki Ister Mınıstrliginiń Atyraý oblysy boıynsha arnaıy qyzmetinde boldy. 2006 jyldyń aqpan aıynan 2007 jyldyń qazan aıy aralyǵynda Qazaqstan Respýblıkasy Ishki Ister Mınıstrliginiń jedel basqarmasyn basqardy.

2007 jyldyń qazan aıynan 2009 jyldyń shilde aıy aralyǵynda Qazaqstan Respýblıkasynyń Ishki Ister Mınıstrliginiń Almaty qalasyndaǵy jedel basqarmasyn basqardy. 2009 jyldyń shilde aıynan 2012 jyldyń maýsym aıy aralyǵynda Qazaqstan Respýblıkasynyń Ishki Ister Mınıstrliginiń arnaıy departamentterin Atyraý,Almaty, Astana qalalarynda basqardy.

2012 jyldyń qyrkúıek aıynan bastap Atyraý oblystyq Ishki Ister departamentiniń bastyǵynyń birinshi orynbasary, 2016 jyldan bastap Atyraý oblystyq Ishki Ister departamentiniń bastyǵy. Qazir Atyraý oblystyq polıııa departamentiniń bastyǵy.

Dúısenbaev Aıan Sábıtuly - fılologııa ǵylymdarynyń kandıdaty, memlekettik marapattardyń ıesi. Dzıýdodan SSR-diń sport sheberi, qazaqsha kúresten QazSSR-diń sport sheberi.
Otbasyly. Jeti balanyń ákesi. Eki uly, bes qyzy, nemere-jıenderi bar.

Osy aqparattyń ózi Aıan Dúısembaevtyń qatardaǵy ýákilden bastap, general-maıorǵa deıingi aralyqtaǵy jıyrma jyldy qalaı júrip ótkenine dálel bolady. Áleýmettik jelige atqa mingen sáti júktelgennen bastap halyqtyń generaldy qorǵaı sóılegeninen-aq, onyń el arasyndaǵy abyroıynyń qanshalyqty ekenine kóz jetkizýge bolady. Kóptegen qaıyrymdylyq sharalary men jetim-jesirge qamqor bolǵanyn jerlesteri endi jazyp jatyr. Ózi ondaı sharalardy jarııalaýǵa qarsy bolypty. Úkimet kóp balaly otbasylardyń jaǵdaıyna kóńil bólemiz deıdi. Kóńil bóletin bolsa, Aıan Sábıtulyn munshalyqty qatań jazalamaıtyn edi. Jeti balasy úshin ǵana sógis berýge bolatyn edi.

Saılaý aldynda prezıdent Qasym-Jomart Toqaev general Dúısembaevqa baılanysty sheshimin qaıta qarasa bir oblystyń ǵana emes, barsha halyqtyń yqylasyna ıe bolar edi. At mingizý qazaqtyń eń úlken qurmeti ekenin asfaltta ósken ózgelerge de úlken nasıhat bolar edi.

Ońǵar Qabden

"Adyrna" ulttyq portaly

Pikirler