پارلامەنت تارايدى

يناۋگۋراتسيادان سوڭ سويلەگەن زەلەنسكي ۋكرايناداعى الەۋمەتتىك ماسەلەرگە توقتالدى. ول "ۇكىمەت ءبىزدىڭ ماسەلەنى شەشپەيدى. ۇكىمەتتىڭ ءوزى - ءبىزدىڭ ماسەلەمىز" دەگەن تسيتاتانى كەلتىرىپ، "پارلامەنتتە كەلەشەك ۇرپاقتىڭ قامىن ويلايتىندار عانا وتىرۋى كەرەك" دەدى.

جاڭا پەرزيدەنت پارلامەنتتەن دەپۋتاتتاردىڭ تيىسپەۋشىلىك مارتەبەسىن الىپ تاستاۋدى، ۋكراينا قاۋىپسىزدىك قىزمەتىنىڭ باسشىسىن، قورعانىس ءمينيسترى مەن باس پروكۋروردى قىزمەتىنەن كەتىرۋدى سۇرادى. زەلەنسكي دەپۋتاتتارعا "بۇل ءۇشىن سىزدەرگە ەكى اي بەرىلەدى" دەدى.

ول ۋكراينانىڭ ەۋروپاعا بەت بۇراتىنىن ايتتى. "ەڭ باستى ماقساتىم - دونباسستاعى داۋعا نۇكتە قويۋ" دەدى زەلەنسكي.

- بىرىگۋىمىز كەرەك. سول كەزدە مىقتى بولامىز. الەمدەگى بارلىق ۋكراينالىققا ايتارىم - ءبىز 65 ميلليونبىز. سىزدەر بىزگە كەرەكسىزدەر، مىقتى دا قۋاتتى ۋكراينا قۇرۋعا ءاربىرىڭىز قاجەتسىزدەر. سىزدەرگە ۋكراينا ازاماتتىعىن بەرۋدى ۋادە ەتەمىن. بۇل - ءبىزدىڭ ۇلتتىق يدەيامىز، - دەدى پرەزيدەنت.

زەلەنسكي دەپۋتاتتارعا قاراتا "كابينەتتەرىڭىزگە مەنىڭ سۋرەتىمدى ىلمەڭىزدەر. پرەزيدەنت - ءمىناجات ەتەتىن نارسە ەمەس. بالالارىڭىزدىڭ سۋرەتىن قويىڭىزدار. قانداي دا ءبىر شەشىم قابىلداماس بۇرىن سولاردىڭ كوزىنە قاراڭىزدار" دەدى.

پرەزيدەنتتى ۇلىقتاۋ ءراسىمى تاڭعى 10.00-دە (نۇر-سۇلتان ۋاقىتىمەن 13.00-دە) باستالدى. يناۋگۋراتسيا وتەردەن بىرەر كۇن بۇرىن پارلامەنتتىك كواليتسيانى تاراپ كەتكەنى بەلگىلى بولدى. بۇل زەلەنسكيدىڭ جوعارعى رادانى تاراتىپ، كەزەكتەن تىس پارلامەنت سايلاۋىن وتكىزۋ جوسپارىنا كەدەرگى كەلتىرۋى مۇمكىن.

قاراي وتىرىڭىز: زەلەنسكيدى ۇلىقتاۋ ءراسىمى

ۇلىقتاۋ راسىمىنە لاتۆيا، ليتۆا، ەستونيا، گرۋزيا مەن ۆەنگريا پرەزيدەنتتەرى، چەحيا سەناتىنىڭ، ازەربايجان پارلامەنتىنىڭ باسشىلارى، بەلارۋس پەن ارمەنيانىڭ پرەمەر-مينيسترلەرى، اقش ەنەرگەتيكا ءمينيسترى، گرۋزيا، مولدوۆا، پولشا، سلوۆاكيا مەن جالپى العاندا ەلۋدەن اسا ەلدىڭ وكىلدەرى كەلدى. بۇدان بولەك سىرتتاي سوتتالعان ۆيكتور يانۋكوۆيچتى ەسەپتەمەگەندە ۋكراينانىڭ بارلىق ەكس-پرەزيدەنتى رادا زالىندا وتىردى.

قازاقستان اتىنان يناۋگۋراتسياعا پارلامەنت سەناتى توراعاسىنىڭ ورىنباسارى بەكتاس بەكنازاروۆ باردى.

ۋكراينادا پرەزيدەنت سايلاۋىنىڭ ەكىنشى كەزەڭى 21 ساۋىردە ءوتتى. جاڭا مەملەكەت باسشىسى رەتىندە اكتەر، شوۋمەن ۆلاديمير زەلەنسكي سايلانعان. قارسىلاسى پوروشەنكو جەڭىلگەنىن مويىنداعانىمەن، كەلەر سايلاۋعا قاتىساتىنىن مالىمدەدى.

"ازاتتىق" راديوسى