گولوۆكين نە ىستەۋ كەرەك ەكەنىن بىلەدى - ابەل سانچەس

2277
Adyrna.kz Telegram

امەريكالىق تانىمال باپكەر ابەل سانچەس TheRing Digital-گە بەرگەن سۇحباتىندا ءوزىنىڭ بۇرىنعى شاكىرتى، قازاقستاندىق گەننادي گولوۆكيننىڭ جاڭا جاتتىقتىرۋشىسى جايلى پىكىرىن ايتتى، - دەپ حابارلايدى Vesti.kz.

ءساۋىردىڭ اياعىندا گولوۆكين سانچەسپەن جۇمىسىن توقتاتقانىن حابارلاعان بولاتىن. ال مامىردىڭ باسىندا ارنايى ءباسپاسوز ءماسليحاتى ءوتىپ، GGG جاڭا باپكەرى دجوناتان بەنكستى تانىستىردى.  سۇحبات بارىسىندا سانچەس گولوۆكيننىڭ ءوزىن شاكىرت سەزىنىپ، جاڭا نارسە ۇيرەنۋىن قالايتىنىن ايتتى.

"ەگەر ولاي جاساي الماسا، دجوناتانعا دەگەن ادىلەتسىزدىك بولار ەدى. بەنكس - كاسىبي، تاجىريبەلى باپكەر. ول قولىڭا ءجاي عانا قولعاپ كيگىزە سالاتىن باپكەر ەمەس. بۇل دجوناتاننىڭ كارەراسى ءۇشىن عانا ەمەس، گەنناديدىڭ دە كارەراسى ءۇشىن ماڭىزدى", - دەدى ول.  سونداي-اق، امەريكالىق باپكەر گەنناديدى كەزدەستىرىپ قالسا، بۇل ءسوزىن وعان ايتپايتىنىن جەتكىزدى.

"ونى الدا ماڭىزدى كۇن كۇتىپ تۇر. سوعان كوڭىل ءبولۋى كەرەك. پوزيتيۆ ەشتەڭە ايتۋىمنىڭ دا قاجەتى جوق. ول نە ىستەۋ كەرەك ەكەنىن بىلەدى. مۇندا توعىز جىل وتكىزدى. وسى ۋاقىت ىشىندە بىزدەن ءبىر نارسە ۇيرەندى دەپ ويلايمىن. ءبارى قولىنان كەلۋى ءتيىس. جەكپە-جەك كورە الامىن دەپ ۇمىتتەنەمىن", - دەدى ابەل سانچەس.

گولوۆكين بەنكستىڭ قول استىندا العاش رەت 8 ماۋسىمدا نيۋ-يوركتە كانادالىق ستيۆ روللسقا قارسى جەكپە-جەك وتكىزەدى.

پىكىرلەر