جۇمابەك اسقار سوت زالىنان قاماۋعا الىنىپ، 6 جىل 6 ايعا سوتتالىپ كەتتى. اكتەر ۇكىم الدىندا پرەزيدەنت توقاەۆقا ۆيدەوۇندەۋ جولداپ، اراشا سۇراعان ەدى، دەپ حابارلايدى «ادىرنا» ۇلتتىق پورتالى.
Ulysmedia.kz مالىمەتىنشە، الماتىدا وليگارح باحاريدين ءابىلازىموۆ پەن دىنمۇحامەت ىدىرىسوۆتىڭ ۇلدارىمەن بىرگە توبەلەسكە قاتىسۋشىلار سوتتالىپ كەتتى.
«سوت ۇكىمىمەن ج.، ق.، ت.، س.، ر.، ن. جانە ك.، قىلمىستىق كودەكستىڭ 293, 106 جانە 107-بابى بويىنشا كىنالى دەپ تانىلدى. ر-عا 6 جىلعا باس بوستاندىعىنان ايىرۋ جازاسى تاعايىندالدى. ق.، ت.، س.، ن.، جانە ك.، ارقايسىسىنا 6 جىل جانە 6 اي مەرزىمگە باس بوستاندىعىنان ايىرۋ جازاسى تاعايىندالدى», – دەپ حابارلادى الماتى سوتىنىڭ ءباسپاسوز قىزمەتى.
بەس كۇزەتشى، ديدجەي جانە مەكەمەگە كەلۋشى «بۇزاقىلىق جاسادى، قاساقانا بۇزاقىلىق جاساعان ادامدار توبىنىڭ دەنساۋلىعىنا اۋىر جانە ورتاشا زيان كەلتىردى» دەپ ايىپتالعان.
«تانىمال قازاقستاندىق اكتەر اسقار جۇمابەك 2022 جىلعى 28 جەلتوقساندا LITTLE BRAZIL كاراوكەسىنە كەلگەن. كەلۋشىلەر قاتارىندا بەلگىلى باي ادامداردىڭ ۇلدارى باحارادين ءابىلازىموۆ پەن دىنمۇحامەت ىدىرىسوۆ، بوستاندىق اۋدانىنىڭ پوليتسيا قىزمەتكەرى ۆاليەۆ ءبىرجان نۇرلانبەكۇلى بولعان. نۇرلانبەكۇلىنىڭ قاتىسۋىمەن بولعان كەلىسپەۋشىلىكتەر كەيىننەن توبەلەسكە ۇلاستى. توبەلەستى اجىراتۋعا تىرىسقان اسقار جۇمابەك 6 جىل 6 ايعا جازىقسىز ايىپپەن سوتتالىپ كەتتى», - دەلىنگەن اسقاردىڭ الەۋمەتتىك جەلىدەگى پاراقشاسىندا.
10 قازانداعى سوت وتىرىسىنان كەيىن اكتەر الەۋمەتتىك جەلى ارقىلى پرەزيدەنتكە جۇگىنىپ ۇلگەرگەن.
«قۇرمەتتى پرەزيدەنت، سىزدەن ءوتىنىپ كومەك سۇراعىم كەلىپ تۇر. مىنا ۆيدەونى تۇسىرۋگە ءماجبۇر بولىپ تۇرمىن. سەبەبى باسىمدا ءبىر ءىس بولىپ جاتىر. مەن حالىقتىڭ الدىندا جۇرگەن اكتەرمىن. وسىدان ءبىر جىل بۇرىن 27 جەلتوقساندا كاراوكەدە جاعداي ورىن الدى. بۇل ءىس كوپ كانالدان كورسەتىلدى. ءىس جالعاسىپ جاتىر. 10 اي بويى ۇيقاماقتا وتىرمىن. ەرتەڭ ۇكىم شىعادى. الدىن-الا ءوزىمدى قورعاۋ جانە سىزدەن كومەك سۇراۋ ماقساتىندا ۆيدەونى ءتۇسىرىپ جاتىرمىن. ادىلدىكتى قالايمىن. ول جەردە مەنىڭ ەش كىنام جوق. ەشكىممەن توبەلەسكەن جوقپىن. قۇرمەتتى پرەزيدەنت، ەگەر ەرتەڭ ءبىزدىڭ باس بوستاندىعىمىزدان ايىراتىنداي جاعداي بولسا، وسى ۆيدەو بۇكىل ينستاگرام ارناسىنا تاراسا دەيمىن. ول جەردە ىدىرىسوۆ پەن ءابىلازىموۆ باحريددەن دەگەن كىسىنىڭ ۇلدارى بولىپ وتىر. كىمگە بارىپ كومەك سۇراسام دا، ءبارى باسىن الىپ قاشادى. قورقادى. مەندە باسقا جول قالمادى. بارىنشا كومەك بەرۋىڭىزدى سىزدەن ءوتىنىپ سۇرايمىن. مەنەن باسقا جىگىتتەر دە ەش سەبەپسىز كەتىپ بارادى. بىزدە اقشا جوق بولسا، ءبارىمىز قامالا بەرۋىمىز كەرەك پە؟ ەگەر سونداي بولسا، قازاقستان ەلىنىڭ ازاماتى بولماي-اق قويايىق. وسى ىسكە كوز جۇگىرتىپ وتەسىز دەگەن ۇمىتتەمىن. توبەلەستى باستاعاندار باعانا ايتقانداردىڭ ۇلدارى بولسا دا، ءبىز سوتتالىپ كەتىپ بارا جاتىرمىز»، - دەگەن ەدى اكتەر الەۋمەتتىك جەلى ارقىلى.
«ادىرنا» ۇلتتىق پورتالى.
