Jumabek Asqar sot zalynan qamaýǵa alynyp, 6 jyl 6 aıǵa sottalyp ketti. Akter úkim aldynda prezıdent Toqaevqa vıdeoúndeý joldap, arasha suraǵan edi, dep habarlaıdy «Adyrna» ulttyq portaly.
Ulysmedia.kz málimetinshe, Almatyda olıgarh Baharıdın Ábilázimov pen Dinmuhamet Ydyrysovtyń uldarymen birge tóbeleske qatysýshylar sottalyp ketti.
«Sot úkimimen J., Q., T., S., R., N. jáne K., qylmystyq kodekstiń 293, 106 jáne 107-baby boıynsha kináli dep tanyldy. R-ǵa 6 jylǵa bas bostandyǵynan aıyrý jazasy taǵaıyndaldy. Q., T., S., N., jáne K., árqaısysyna 6 jyl jáne 6 aı merzimge bas bostandyǵynan aıyrý jazasy taǵaıyndaldy», – dep habarlady Almaty sotynyń baspasóz qyzmeti.
Bes kúzetshi, dıdjeı jáne mekemege kelýshi «buzaqylyq jasady, qasaqana buzaqylyq jasaǵan adamdar tobynyń densaýlyǵyna aýyr jáne ortasha zııan keltirdi» dep aıyptalǵan.
«Tanymal qazaqstandyq akter Asqar Jumabek 2022 jylǵy 28 jeltoqsanda LITTLE BRAZIL karaokesine kelgen. Kelýshiler qatarynda belgili baı adamdardyń uldary Baharadın Ábilázimov pen Dinmuhamet Ydyrysov, Bostandyq aýdanynyń polıııa qyzmetkeri Valıev Birjan Nurlanbekuly bolǵan. Nurlanbekulynyń qatysýymen bolǵan kelispeýshilikter keıinnen tóbeleske ulasty. Tóbelesti ajyratýǵa tyrysqan Asqar Jumabek 6 jyl 6 aıǵa jazyqsyz aıyppen sottalyp ketti», - delingen Asqardyń áleýmettik jelidegi paraqshasynda.
10 qazandaǵy sot otyrysynan keıin akter áleýmettik jeli arqyly prezıdentke júginip úlgergen.
«Qurmetti prezıdent, sizden ótinip kómek suraǵym kelip tur. Myna vıdeony túsirýge májbúr bolyp turmyn. Sebebi basymda bir is bolyp jatyr. Men halyqtyń aldynda júrgen aktermin. Osydan bir jyl buryn 27 jeltoqsanda karaokede jaǵdaı oryn aldy. Bul is kóp kanaldan kórsetildi. Is jalǵasyp jatyr. 10 aı boıy úıqamaqta otyrmyn. Erteń úkim shyǵady. Aldyn-ala ózimdi qorǵaý jáne sizden kómek suraý maqsatynda vıdeony túsirip jatyrmyn. Ádildikti qalaımyn. Ol jerde meniń esh kinám joq. Eshkimmen tóbelesken joqpyn. Qurmetti prezıdent, eger erteń bizdiń bas bostandyǵymyzdan aıyratyndaı jaǵdaı bolsa, osy vıdeo búkil ınstagram arnasyna tarasa deımin. Ol jerde Ydyrysov pen Ábilázimov Bahrıdden degen kisiniń uldary bolyp otyr. Kimge baryp kómek surasam da, bári basyn alyp qashady. Qorqady. Mende basqa jol qalmady. Barynsha kómek berýińizdi sizden ótinip suraımyn. Menen basqa jigitter de esh sebepsiz ketip barady. Bizde aqsha joq bolsa, bárimiz qamala berýimiz kerek pe? Eger sondaı bolsa, Qazaqstan eliniń azamaty bolmaı-aq qoıaıyq. Osy iske kóz júgirtip ótesiz degen úmittemin. Tóbelesti bastaǵandar baǵana aıtqandardyń uldary bolsa da, biz sottalyp ketip bara jatyrmyz», - degen edi akter áleýmettik jeli arqyly.
«Adyrna» ulttyq portaly.
