شىعىس قازاقستان وبلىسىنىڭ ريددەر قالاسىندا رەسەي رەۆوليۋتسيونەرى سەرگەي كيروۆتىڭ ەسكەرتكىشىن قالپىنا كەلتىرۋ تۋرالى شەشىم قابىلداندى، دەپ حابارلايدى «ادىرنا» ءتىلشىسى YK-news.kz-كە سىلتەمە جاساپ.
«ءساۋىر ايىندا قالا بيلىگى كيروۆ ەسكەرتكىشىنىڭ تۇعىرىنىڭ بۇزىلۋىنا بايلانىستى ونى الىپ تاستاۋ مۇمكىن ەكەنىن ايتقان ەدى. ەندى ەسكەرتكىشتى قالپىنا كەلتىرۋ تۋرالى شەشىم قابىلداعانى بەلگىلى بولدى.
ەسكەرتكىش ۇزاق جىلدار بويى ەشكىمگە كەرەك بولمادى. ول قالا ورتالىعىندا ورنالاسقانىمەن، بىرتە-بىرتە رەڭى كەتە باستادى. باستاماشىل توپ قالاداعى ءتيىستى ورگاندارعا حات جازىپ، توزىعى جەتكەن ەسكەرتكىشتى ءوز قاراجاتىنا جوندەيتىندىكتەرىن ايتقان. جازدا جۇمىس باستالىپ، كيروۆ ءمۇسىنى بوياۋعا دايىندالدى. بىراق كەنەتتەن ءبارى توقتاپ قالدى. كۇنى كەشە ەرىكتىلەر جۇمىستىڭ قايتا جالعاساتىنىن، كەلەسى اپتانىڭ سوڭىنا دەيىن سەرگەي ءميرونوۆيچتىڭ ءمۇسىنى قايتا بويالاتىنىن جەتكىزدى. 10 قاراشاعا دەيىن قيراعان تۇعىر قالپىنا كەلتىرىلەدى»،— دەپ جازدى باسىلىم.
سەرگەي كيروۆ — رەسەي رەۆوليۋتسيونەرى، كەڭەس مەملەكەتتىك جانە ساياسي قايراتكەرى. ول 1934 جىلدىڭ 1 جەلتوقسانىندا قاستاندىق جاساۋ ناتيجەسىندە مەرت بولدى. كيروۆتىڭ ءولىمى «ۇلكەن تەررور» اتىمەن تانىلعان جاپپاي رەپرەسسيانىڭ باستالۋىنا تۇرتكى بولدى.
ەسكە سالايىق، بۇعان دەيىن شىعىس قازاقستان وبلىسىندا ۆلاديمير لەنيننىڭ ەسكەرتكىشىن قالپىنا كەلتىرۋگە قارسى پەتيتسيا پايدا بولعان ەدى. بۇل ءمۇسىن 15 تامىزدا التاي قالاسىنىڭ ورتالىق الاڭداعى جوندەۋ جۇمىستارى كەزىندە ابايسىزدا قۇلاپ كەتكەن بولاتىن. مەردىگەر كومپانيا جۇمىس بارىسىندا «ەسكەرتكىش وزدىگىنەن قۇلاعانىن» ايتتى. كەيىن قازنەتتە كۋاگەرلەردىڭ بەينەجازباسى پايدا بولىپ، وندا جۇك كوتەرگىش تەحنيكانىڭ ايبايسىزدا مۇسىنگە قالاي ءتيىپ كەتكەنى كورسەتىلدى. اتالعان فاكتى بويىنشا قر قىلمىستىق كودەكسىنىڭ 203-بابىنىڭ 1-بولىگى (ەرەكشە قۇندى زاتتاردى قاساقانا جويۋ، الۋ نەمەسە ءبۇلدىرۋ) بويىنشا قىلمىستىق ءىس قوزعالدى.
