Astanada Álemdik jáne dástúrli dinder lıderleri sezi hatshylyǵynyń HHI otyrysy bastaldy, - dep habarlaıdy "Adyrna" tilshisi.
Otyrys Parlament Senatynyń Tóraǵasy – Álemdik jáne dástúrli dinder lıderleri sezi hatshylyǵynyń meńgerýshisi Máýlen Áshimbaevtyń jetekshiligimen ótýde. Ol Prezıdent Qasym-Jomart Toqaevtyń jıynǵa qatysýshy álemdik dinder kóshbasshylaryna arnaǵan arnaıy quttyqtaýyn aıtty.
«Barshańyzdy Álemdik jáne dástúrli dinder lıderleri sezi hatshylyǵynyń 21-shi otyrysynyń ashylýymen shyn júrekten quttyqtaımyn. Bul bastama qysqa ýaqyt ishinde óziniń ózektiligin dáleldep, órkenıetaralyq dıalogtyń mańyzdy alańyna aınaldy. Forým dinder arasyndaǵy dostyq pen kelisimdi nyǵaıtýǵa, búkil adamzattyń ózekti máselelerin sheshýge jáne tózimdilikti nasıhattaýǵa árqashan óz úlesin qosyp keledi.», - delingen quttyqtaýda.
Memleket basshysy atap ótkendeı, kezdesýler barysynda álemniń túkpir-túkpirinen kelgen rýhanı kóshbasshylar álem jurtshylyǵyn tolǵandyryp júrgen ózekti máselelerdi talqylap, beıbitshilikti saqtaý jáne ózara syılastyqty arttyrý jóninde oı bólisti.
"Búginde geosaıası jaǵdaı ýshyǵyp, túrli qaýip-qaterler kúsheıip keledi. Qazirgi qıyn kezeńde adamgershilik, meıirimdilik, baýyrlastyq, jaýapkershilik qaǵıdattarynyń mańyzy artyp keledi. Sondaı-aq halyqaralyq qaýipsizdiktiń jańa júıesin qalyptastyrý mańyzdy máselege aınalyp otyr. Ol úshin beıbitshilikke shaqyratyn dúnıejúzilik qozǵalys qajet. Sonymen qatar dinder mańyzdy ról atqarady. Osy máselelerdi sheshýge rýhanı kóshbasshylar úlken úles qosýda. Osy maqsatta hatshylyq sezdiń otyrysy uıymdastyrylady. Qazaqstan árqashan dinaralyq jáne konfessııaaralyq yntymaqtastyqty qoldaıdy. Álemdik jáne dástúrli dinder sezi hatshylyǵynyń 21-shi otyrysynyń barlyq jetekshilerine jemisti jumys tileımin», - delingen Memleket basshysynyń málimdemesinde.
