يزرايل ەرىكتىلەرى گازا سەكتورىنا جاقىن ورنالاسقان بەەري كيبۋتسىندا حاماس شابۋىلىنان قازا تاپقان 100-دەن استام ادامنىڭ ءمايىتىن تاپقانىن مالىمدەدى، دەپ حابارلايدى «ادىرنا» ۇلتتىق پورتالى.
ازاتتىق راديوسىنىڭ مالىمەتىنشە، جەرگىلىكتى تۇرعىننىڭ ءبىرى كيبۋتستىڭ تولىق جويىلعانىن ايتتى. بۇعان دەيىن بەەريدە مىڭعا جۋىق ادام تۇرعان. مايىتتەر ءالى دە كوپ بولۋى مۇمكىن.
بەەري كيبۋتسى — 7 قازاندا تاڭەرتەڭ حاماس شابۋىلىنا ۇشىراعان ەلدى مەكەننىڭ ءبىرى. مۇنداعى تۇرعىنداردىڭ كەپىلگە الىنىپ، كەيىن بوساتىلعانى تۋرالى حابار تارادى.
بۇعان دەيىن يزرايل اسكەرىنىڭ وكىلدەرى حاماس سودىرلارىنا قوسىمشا كۇشتەر گازادان بەەريگە دەيىن قازىلعان جەراستى جولىمەن كەلۋى مۇمكىن دەگەن بولجام ايتقان.
سونداي-اق 7 قازاننان بەرى حاماس-تىڭ يزرايلگە شابۋىلى كەزىندە كەم دەگەندە 900 ادام قازا بولىپ، ەكى جارىم مىڭعا جۋىق ادام جارالانعان. جۇزدەگەن ادام حابار-وشارسىز كەتتى، تاعى جۇزگە جۋىق ادام كەپىلگە الىنعان، ولار گازا سەكتورىندا بولۋى مۇمكىن.
ەسكە سالساق، يزرايل شابۋىلعا جاۋاپ رەتىندە «تەمىر قىلىش» اسكەري وپەراتسياسىن جۇرگىزىپ، گازا سەكتورىنداعى نىساندارعا شابۋىل جاساپ جاتىر. پالەستينا تاراپىنىڭ حابارلاۋىنشا، يزرايل قورعانىس كۇشتەرىنىڭ سوققىسىنان 700-گە جۋىق پالەستينالىق قازا تاۋىپ، گازاداعى ءتورت مىڭعا جۋىق تۇرعىن جارالانعان.
«ادىرنا» ۇلتتىق پورتالى
