قازاقستاندىق ساياساتتانۋشى ءارى قىتايتانۋشى كونستانتين سىروەجكين "مەملەكەتكە وپاسىزدىق جاساۋ" بابى بويىنشا كۇدىككە ءىلىنىپ، ۇستالدى. بۇل اقپاراتتى قازاقستاننىڭ ۇلتتىق قاۋىپسىزدىك كوميتەتىنە (ۇقك) سىلتەمە جاساعان جەرگىلىكتى اقپارات اگەنتتىكتەرى حابارلادى.
"ۇقك 2019 جىلى 15 قاڭتاردا 1956 جىلى تۋعان قازاقستان رەسپۋبليكاسىنىڭ ازاماتى كونستانتين سىروەجكيننىڭ ۇستىنەن 175-باپ، 1-بولىگى بويىنشا ("مەملەكەتكە وپاسىزدىق جاساۋ") قىلمىستىق ءىس قوزعادى" دەلىنگەن ۇقك حابارلاماسىندا.
ۇقك-ءنىڭ ءباسپاسوز قىزمەتىنىڭ حابارلاۋىنشا، 62 جاستاعى ساياساتتانۋشىنى 19 اقپاندا ۇستاعان. كوميتەت وكىلدەرى بۇدان باسقا مالىمەت ايتپاعان.
ازاتتىق كونستانتين سىروەجكيننىڭ ىسىنە بايلانىستى ۇقك-عا 6 مامىردا رەسمي ساۋال جىبەردى. وتىنىشتە ازاتتىق ءتىلشىسى كۇدىكتىنىڭ ادۆوكات قىزمەتىن پايدالانۋ قۇقىعى جانە قاماۋ جاعدايى تۋرالى سۇراعان ەدى. 16 مامىردا كوميتەتتىڭ ءباسپاسوز قىزمەتى ازاتتىققا رەداكتسيادان كەلگەن "حاتتى تابا الماي وتىرعانىن" ايتتى. 17 مامىردا حات قايتا جىبەرىلىپ، ۇقك ونى العانىن راستادى.
جەرگىلىكتى باق-تىڭ جازۋىنشا، الماتىدا تۋىپ-وسكەن 62 جاستاعى كونستانتين سىروەجكين قازاقستاندا ۇزاق جىلدار بويى قىزمەت اتقارعان، ەلدە قىتاي ماسەلەلەرى بويىنشا جەتەكشى ساراپشىلاردىڭ ءبىرى. ورىس، اعىلشىن جانە قىتاي تىلىندە جارىق كورگەن مىڭنان استام ماقالانىڭ اۆتورى. 2006 جىلدان باستاپ قازاقستان پرەزيدەنتى جانىنداعى قازاقستاندىق ستراتەگيالىق زەرتتەۋلەر ينستيتۋتىنىڭ باس عىلىمي قىزمەتكەرى بولعان.
سىروەجكيندى اقپان ايىندا قاماۋى مۇمكىن ەكەنىن بۇعان دەيىن ازاتتىق تىلشىسىنە ادام قۇقىعىن قورعاۋ جونىندەگى قازاقستاندىق بيۋرونىڭ ديرەكتورى ەۆگەني جوۆتيس ايتقان. ونىڭ ايتۋىنشا، ءدال وسى ۋاقىتتا قىتايتانۋشىنىڭ ارىپتەستەرىمەن بايلانىسى ءۇزىلىپ قالعان.
جەرگىلىكتى باق-تىڭ جازۋىنشا، ول اقپان ايىندا وتكەن رەسپۋبليكاداعى قىتايتانۋ بويىنشا كونفەرەنتسيا كەزىندە بايانداما جاساۋى ءتيىس بولعان، بىراق شاراعا قاتىسپاعان. ءساۋىر ايىندا قىتايدىڭ ء"بىر بەلدەۋ - ءبىر جول" اتتى ءىرى جوباسىنا ارنالعان الماتىداعى ءىرى شاراعا دا كەلمەگەن.
"ازاتتىق" راديوسى
