اتىراۋ وبلىسىنداعى ۆاحتالىق لاگەر اۋماعىندا قوقىس اراسىنان قازاقستاننىڭ تۋى تابىلدى. وقيعانى جەرگىلىكتى تۇرعىندار ۆيدەوعا ءتۇسىرىپ العان، دەپ حابارلايدى «ادىرنا» ۇلتتىق پورتالى موي گورود پورتالىنا سىلتەمە جاساپ.
«بۇل - SICIM بازاسى. مەملەكەتتىك تۋىمىز №8 كۆارتال ماڭىندا قوقىس قالدىقتارىنىڭ اراسىندا جاتىر. قازاقستاننىڭ كوك تۋىن جەرگە تاپتاپ جاتىر؟ ءبىز شارا قولدانۋدى تالاپ ەتەمىز»، - دەگەن ۆيدەو اۆتورلارى.
بەلگىلى بولعانداي، بەينەجازبا قاراباتان كەن ورنى اۋماعىندا تۇسىرىلگەن. اتىراۋ وبلىستىق پوليتسيا دەپارتامەنتىنىڭ ءباسپاسوز قىزمەتى اتالعان فاكتى بويىنشا قر قىلمىستىق كودەكسىنىڭ 372-بابى «قازاقستان رەسپۋبليكاسىنىڭ مەملەكەتتىك رامىزدەرىن قورلاۋ» بويىنشا سوتقا دەيىنگى تەرگەۋ ءجۇرىپ جاتقانىن حابارلادى. تەرگەۋ مۇددەسى ءۇشىن ءتارتىپ ساقشىلارى باسقا مالىمەتتەردى جاريالامادى. باپتىڭ سانكتسياسىندا ءىرى ايىپپۇلدان ەكى جىلعا دەيىن باس بوستاندىعىنان ايىرۋ جازاسى قاراستىرىلعان.
«ادىرنا» ۇلتتىق پورتالى
