اتىراۋدا بەت-ءجۇزىن تۇمشالاعان بىرنەشە بويجەتكەننىڭ قازاقستان تۋىن وزگەرتىلگەن نۇسقادا ۇستاعان فوتوسى الەۋمەتتىك جەلىدە تاراپ، قوعامنىڭ قىزۋ تالقىسىنا ءتۇستى. تۋدىڭ جوعارعى بولىگىنە ارابشا جازۋ مەن قىلىش بەينەسى قوسىلعان، دەپ حابارلايدى "ادىرنا" ۇلتتىق پورتالى.
وقيعا اتىراۋداعى حيۋاز دوسپانوۆا اتىنداعى مۇز سارايىندا بولعان بولۋى مۇمكىن. اتىراۋ وبلىستىق پوليتسيا دەپارتامەنتىنىڭ مالىمەتىنشە، سۋرەتكە تۇسكەن ءتورت كۇدىكتى انىقتالىپ، ولار پوليتسيا بولىمشەسىنە جەتكىزىلگەن. ولاردىڭ ەكەۋى – ءجاسوسپىرىم.
"الەۋمەتتىك جەلىدە تاراعان جازبا بويىنشا «مەملەكەتتىك رامىزدەردى قورلاۋ» بابىمەن قىلمىستىق ءىس تىركەلىپ، سوتقا دەيىنگى تەرگەۋ امالدارى جۇرگىزىلىپ جاتىر. جاسوسپىرىمدەردەن جاۋاپ الۋ اتا-اناسىنىڭ قاتىسۋىمەن جۇرگىزىلۋدە. تەرگەۋ مۇددەسىنە سايكەس وزگە اقپارات جاريالانبايدى،" – دەلىنگەن پوليتسيا حابارلاماسىندا.
پرەزيدەنت قاسىم-جومارت توقاەۆ بۇعان دەيىن ۇلتتىق كيىمدەر مەن ۇلتتىق بولمىس تۋرالى پىكىر بىلدىرگەن بولاتىن.
"بەت-ءجۇزدى تۇمشالايتىن قارا كيىمنەن گورى ءوزىمىزدىڭ ۇلتتىق كيىمدەرىمىز الدەقايدا ارتىق. اسىرەسە، ايەلدەردىڭ ءداستۇرلى كيىمى وتە عاجاپ كورىنەدى. سەبەبى ۇلتتىق كيىم – بۇل ءبىزدىڭ بىرەگەي ۇلتتىق بولمىسىمىزدىڭ ماڭىزدى كورىنىسى. ونى جان-جاقتى دارىپتەۋىمىز كەرەك،" – دەگەن ەدى مەملەكەت باسشىسى ۇلتتىق قۇرىلتايدا.
قازىرگى تاڭدا قازاقستان رەسپۋبليكاسىنىڭ مەملەكەتتىك رامىزدەرىن قورلاۋ قىلمىستىق جاۋاپكەرشىلىككە تارتىلاتىن ارەكەت بولىپ سانالادى. تەرگەۋ ناتيجەلەرى بويىنشا ناقتى شەشىم قابىلدانباق.
