قىتاي حالىق رەسپۋبليكاسى مەملەكەتتىك كەڭەسىنىڭ ۆيتسە-پرەمەرى حان چجەن قازاقستان مەن قىتايدىڭ ىسكە اسىرعان شارالارىن اتاپ بەردى، دەپ حابارلايدى Sputnik قازاقستان تىلشىسى.
"قازاقستان – ءبىزدىڭ كورشىمىز ءارى ستراتەگيالىق ارىپتەسىمىز. ءدال وسى جەردە جىبەك جولىنىڭ ەكونوميكالىق بەلدەۋىنە ارنالعان باستاما كوتەرىلدى. ءبىزدى ەكونوميكالىق مۇددە عانا ەمەس، اجىراماس تاعدىر دا جاقىنداستىرادى. دوستىعىمىزدىڭ ناتيجەسى دە ايتارلىقتاي. ءبىز ءبىرىنشى بولىپ، شەكارا ماسەلەسىن شەشىپ، سول شەكارانىڭ 1780 شاقىرىمىن دوستىقتىڭ دانەكەرىنە اينالدىردىق", - دەدى چجەن XII استانا ەكونوميكالىق فورۋمىنىڭ پلەنارلىق وتىرىسىندا.
ونىڭ ايتۋىنشا، قازاقستان مەن قىتاي ءبىرىنشى بولىپ مۇناي-گاز قۇبىرلارىن تارتىپ، ەنەرگەتيكالىق ارىپتەستىكتى كۇشەيتتى. ەكى مەملەكەت جان-جاقتى ىنتىماقتاستىقتى جولعا قويدى. ءونىدىرىس پەن يننوۆاتسيالار سالاسىنداعى قارىم-قاتىناستىڭ ورنى بولەك.
"بۇگىندە جالپى قۇنى 27 ميلليارد دوللار 55 بىرلەسكەن جوبا ماقۇلداندى. بۇدان بولەك، ءبىز ءبىرىنشى بولىپ ليانيۋنگان سياقتى لوگيستيكالىق بازانى ىسكە قوسىپ، "قورعاس" حالىقارالىق ىنتاماقتاستىق ورتالىعىن اشتىق. "قورعاس – شىعىس قاقپاسى" ارنايى ەكونوميكالىق ايماعىمىز بار. وسىنىڭ ءبارى تىعىز قارىم-قاتىناستى ورناتۋعا مۇمكىندىك بەردى. ءبىزدىڭ ماقساتىمىز بىردەي، ال ەكونوميكالىق كوزقاراسىمىز ۇقساس. دامۋ ستراتەگيالارىمىز دا ءبىرىن-ءبىرى تولىقتىرىپ وتىرادى. قىتاي مەن قازاقستاننىڭ ارمانىن بىرگە ىسكە اسىرايىق!", - دەپ اتاپ كورسەتتى چجەن.
قىتايدىڭ ۆيتسە-پرەمەرى قازاقستاننىڭ اقىلدى قالالار باستاماسىن ىسكە اسىرۋعا دايار ەكەنىن جەتكىزدى. بۇدان بولەك، كورشى مەملەكەت ەلەكتروندى ساۋدا، تسيفرلىق ەكونوميكا، تسيفرلىق ءوندىرىس، بيولوگيالىق تەحنولوگيالار جانە بالامالى ەنەرگيا كوزدەرى بويىنشا بىرلەسىپ جۇمىس ىستەۋگە ءازىر.
