رەسەيدە تۇرىپ جاتقان قازاقستان ازاماتى موبيليزاتسياعا بايلانىستى اسكەرگە شاقىرتۋ العان. بۇل اقپاراتتى سىرتقى ىستەر مينيسترلىگى راستادى، دەپ حابارلايدى “ادىرنا” ۇلتتىق پورتالى.
دەگەنمەن ول ەلىمىزدىڭ زاڭىنا سايكەس اسكەردە بورىشىن وتەمەيدى. سىرتى ىستەر مينيسترلىگىنىڭ مالىمەتىنشە، رەسەيدە تۇرىپ جاتقان جانە تۇرۋ تۋرالى ىقتيارحات العان قازاقستاندىقتار اسكەرگە شاقىرتۋ السا، ەلشىلىككە جۇگىنە الادى نەمەسە اسكەري كوميسسارياتقا قۇجاتىن كورسەتە الادى.
"مۇنداي جاعدايلار بولىپ تۇرادى، مالىمەت بازاسىندا سايكەسسىزدىكتەر بار شىعار. ادام رەسەي تەرريتورياسىندا دەلىك، ونىڭ تۇرۋعا ىقتيارحاتى بار. تۇرعىلىقتى جەرى - ازاماتتىق ەمەس، قازاقستاننىڭ ازاماتتىعى ءالى ساقتالادى. بىراق دەرەكقوردا قاتە كەتكەن سياقتى. بۇل جاعدايدا قازاقستان رەسپۋبليكاسى ازاماتى ءوزىنىڭ قۇجاتىن اسكەري كوميسسارياتقا كورسەتە الادى نەمەسە ەلشىلىككە تاعى ءبىر رەت حابارلاسىپ، قازاقستان ازاماتى ەكەنىنە كوزجەتكىزە الادى. بۇل جەردە ەش قيىندىق جوق، تەك ونىڭ قازاقستان ازاماتى ەكەنىن زاڭدى تۇردە دالەلدەۋ كەرەك", - دەدى ءسىم ءباسپاسوز حاتشىسى ايبەك سمادياروۆ.
