بۇگىن كورەرمەنگە ەندى عانا جول تارتقان «مىرجاقىپ. ويان، قازاق!» ءفيلمىنىڭ 4 قازاندا پروكاتتان الىنعانى تۋرالى اقپارات تاراعان بولاتىن. بۇل تۋرالى ءفيلمنىڭ رەجيسسەرى مۇرات ەسجان دا، Qazaqstan ۇلتتىق ارناسى دا حابارلاعان ەدى. ەندى كينورەجيسسەر مۇرات ەسجان كورەرمەن قالاۋىمەن ءفيلمنىڭ كورسەتىلىمى تاعى ءبىر اپتا ۇزارتىلعانىن ايتتى, دەپ حابارلايدى “ادىرنا” ۇلتتىق پورتالى.
“قۋانىشتى جاڭالىق! قالىڭ كورەرمەننىڭ قالاۋى بولىپ، “ويان، قازاقتىڭ” كينوتەاترلارداعى كورسەتىلىمى تاعى ءبىر اپتاعا ۇزارتىلدى! ەندى تالابىمىزعا قادامىمىز ساي بوپ، كەلەسى اپتانى دا انشلاگ جاسايىق! كينوتەاترلار دا سۇرانىستى كوردى عوي، مۇمكىن سەانستار سانىن بۇدان دا ۇلعايتار! مەملەكەتتىڭ جۇمساعان قارجىسى اقتالعان (فيلم 100 پايىز مەمبيۋدجەتكە تۇسىرىلگەن) العاشقى تاريحي جوبا بولسا دەگەن تىلەك بار”، دەپ جازدى ول.
ايتا كەتەيىك، كينوپارك وكىلدەرى كورەرمەنگە ەندى عانا جول تارتقان «مىرجاقىپ. ويان، قازاق» ءفيلمىنىڭ پروكاتتان الىنۋى Qazaqstan Tv ارناسىنىڭ كەلىسىمىمەن بولعانىن ايتقان ەدى.
ال ۇلتتىق ارنا ءار ءفيلمنىڭ باستاپقىدا بەلگىلەنگەن ۋاقىت ارالىعىندا عانا كورسەتىلەتىنىن ايتىپ، بۇل ماسەلەدە ەشكىمگە كىنا ارتپاۋدى سۇراعان.
الاش قايراتكەرى مىرجاقىپ دۋلاتوۆ 1928 جىلى ماسكەۋدە تۇتقىندالىپ، اۋەلدە ءولىم جازاسىنا كەسىلگەن. كەيىن بۇل ۇكىم 10 جىل تۇرمە جازاسىنا الماستىرىلىپ، لاگەرگە ايدالادى. 1935 جىلى ۇزاق قۋدالاۋ مەن قورلىق سالدارىنان اۋرۋعا شالدىعادى. مىرجاقىپ سول جىلى 5 قازاندا سولوۆكي لاگەرىندە 50 جاسقا قاراعان شاعىندا دۇنيە سالدى.
