بالانىڭ ناقتى نەدەن قايتىس بولعانى سوت-مەديتسينالىق ساراپتامانىڭ ناتيجەسى بويىنشا انىقتالادى
الماتى پوليتسيا دەپارتامەنتىنىڭ تەرگەۋ باسقارماسىندا التى جاسار قىزدىڭ كوز جۇمۋ فاكتىسى بويىنشا سوتقا دەيىنگى تەرگەۋ باستالدى.
قىزىنىڭ كوز جۇمعانىن بۇرىنعى ايەلىنەن ەستىگەن
تراگەديانىڭ قالاي بولعانىن بالانىڭ اكەسى Facebook-تەگى پاراقشاسىندا تارقاتىپ ايتتى.
"قايعىلى وقيعا بولدى، قىزىم تۇسىنىكسىز جاعدايدا قايتىس بولدى، ونى ءولتىردى دەپ كۇدىكتەنىپ وتىرمىن. مەنىڭ پەرىشتەم 6 جاستا. بۇل ءماتىندى جازۋ ماعان وتە قيىن، بىراق قازىرگى جاعداي وسىعان ماجبۇرلەپ وتىر!" - دەپ جازدى ەر ادام.
ونىڭ ايتۋىنشا، اجىراسقاننان كەيىن قىزى وزىمەن بىرگە قالعان، كەيدە اناسىنىڭ ۇيىنە بارىپ تۇرىپتى. بۇرىنعى ايەلى ونى سوڭعى رەت 9 مامىردا اكەتىپ، ءوزىنىڭ اكەسىنىڭ ۇيىنە الىپ بارعان. ال ءتورتىنشى كۇنى، 12 مامىردا تەلەفون ارقىلى قىزى 12-ءشى قالالىق كلينيكالىق اۋرۋحانانىڭ جانساقتاۋ بولىمىندە جاتقانى جايلى قورقىنىشتى حابار الادى.
ەر ادام قىزىنىڭ بالالار ەمەس، ەرەسەكتەر اۋرۋحاناسىنا جەتكىزىلۋى كوڭىلىنە كۇدىك ۇيالاتقانىن ايتادى. ول دەرەۋ كلينيكاعا جولعا شىققان، دەگەنمەن ءبىراز ۋاقىتتان كەيىن وعان قىزىنىڭ قايتىس بولعانىن حابارلاپتى.
اۋرۋحانانىڭ قابىلداۋ بولمەسىندە وتىرعان بۇرىنعى ايەلى، قايىن اتاسى جانە تاعى باسقا ءبىر تۋىسى بولعان وقيعانى ءارتۇرلى بايانداعان. الدىمەن ولار بالا اۋلاداعى مۇسىننەن قۇلاپ تۇسكەنىن، كەيىن ول ءمۇسىننىڭ قىزدى باسىپ قالعانىن ايتقان، سودان سوڭ يت قاۋىپ الدى دەپ شىققان.
ەش جەردە بالانىڭ قانى بولماعان
"قىزىمنىڭ ءىشىنىڭ تومەنگى جاعىندا ۇزىندىعى 25 سانتيمەترگە جۋىق كولدەنەڭ تىلىك بولدى، ول جەردەن باۋىرى كورىنىپ تۇردى، كوپتەگەن جاراقات العان، پىشاق جاراقاتىنا ۇقسايدى، سونداي-اق سول اياعىنداعى، جامباسىنداعى بۇلشىقەتى جۇلىنعان، ول جەردەن سۇيەك كورىنىپ تۇر. توبىعىنان سانعا دەيىن كەسىلگەن. مۇنىڭ ءبارىن سۋرەتكە ءتۇسىرىپ الدىم، ويتكەنى ءمۇسىن قۇلادى دەگەن ءسوز دەرەۋ كۇمان تۋعىزدى. ونىڭ ۇستىنە، ەشقانداي قان بولعان جوق", - دەپ جازدى ول.
قان اۋلادا دا، مۇسىندە دە، كيىمدە دە بولماعان.
ەر ادام وقيعا بولعان كۇننەن باستاپ بۇرىنعى ايەلىنىڭ تۋىستارى – اكەسى مەن كۇيەۋ بالاسى قاتتى قىسىم جاساپ جاتقانىن ايتادى. بۇرىنعى قايىن اتاسى قازاقستانعا بەلگىلى بيزنەسمەن، ءىرى جيھاز سالوندار جەلىسىنىڭ قوجايىنى ەكەن، ال كۇيەۋ بالاسى ەلىمىزدەگى كۇش قۇرىلىمدارىنىڭ ءبىرىنىڭ اۋداندىق بولىمشەسىن باسقاراتىن كورىنەدى. قايعىدان قان جۇتىپ وتىرعان اكە ولار مۇنى قايعىلى جاعداي رەتىندە كورسەتۋگە تىرىسىپ باعاتىندارىن جوققا شىعارمايدى.
ء"ىس بارىنشا اشىق جانە وبەكتيۆتى تۇردە قارالۋى ءۇشىن مۇمكىندىگىنشە كوپ ادامعا جاريالاۋعا بارلىعىڭىزدان كومەك سۇرايمىن", - دەپ جازدى ول ءوز ۇندەۋىنىڭ سوڭىندا.
الماتى پوليتسيا دەپارتامەنتىنىڭ تۇسىنىكتەمەسى
"بۇل فاكت بويىنشا ماتەريالدار بىرىڭعاي سوتقا دەيىنگى تەرگەۋ رەەسترىنە تىركەلدى. تەرگەۋ قازاقستان رەسپۋبليكاسى قىلمىستىق كودەكسىنىڭ 99-بابى "كىسى ءولتىرۋ" بويىنشا جۇرگىزىلىپ جاتىر", - دەپ حابارلادى ۆەدومستۆونىڭ ءباسپاسوز قىزمەتى.
ولار سونداي-اق، قىزدىڭ ناقتى نەدەن قايتىس بولعانى بىرقاتار ساراپتامانىڭ، سونىڭ ىشىندە سوت-مەديتسينالىق ساراپتامانىڭ ناتيجەسى بويىنشا انىقتالاتىنىن جانە سودان كەيىن عانا پروتسەسسۋالدىق شەشىم قابىلداناتىنىن اتاپ ءوتتى.
Sputnik
