ۇلتتىق ستاتيستيكا بيۋروسى قازاقستانداعى حالىق سانى تۋرالى ناقتىلانعان مالىمەتتەردى ۇسىندى، - دەپ حابارلايدى "ادىرنا" پورتالى.
ۆەدومستۆونىڭ مالىمەتىنشە، 1 قىركۇيەكتە ەل حالقىنىڭ سانى 19 ملن 944 مىڭ 726 ادامدى قۇرادى.
رەسپۋبليكا بويىنشا 12 368 662 ادام قالا حالقىنا، 7 576 064 ادام اۋىل حالقىنا تيەسىلى.
جىل باسىنان بەرى ەل حالقىنىڭ سانى 177 مىڭ ادامعا ءوستى، ونىڭ 172 مىڭى تابيعي ءوسىم ەسەبىنەن (تۋىلعاندار سانى ولگەندەر سانىنان اسىپ ءتۇستى), 5,8 مىڭ ادام كوشى-قوننىڭ وڭ سالدوسى ەسەبىنەن.
وڭىرلەر اراسىندا ەڭ كوپ الماتى قالاسىندا – 2 205 929 ادام. ودان كەيىنگى ورىندا تۇركىستان وبلىسى – 2 135 537 ادام، الماتى وبلىسى – 1 522 182 حالىق سانى بويىنشا العاشقى ۇشتىكتى تۇيىندەپ تۇر.
استانا حالىق سانى بويىنشا ءتورتىنشى ورىندا – 1 402 002 ادام، جامبىل وبلىسى بەسىنشى ورىندا، 1 221 619 ادام.
«حالىق سانى – بەلگىلى ءبىر ۋاقىتتا بەلگىلى ءبىر اۋماقتا تۇراتىن ادامداردىڭ سانى.جىل باسىنداعى اعىمداعى باعالاۋلار سوڭعى حالىق ساناعىنىڭ ناتيجەلەرى بويىنشا ەسەپتەلەدى، وعان جىل سايىن تۋعاندار مەن كوشىپ كەلگەندەر سانى قوسىلادى. بەلگىلى ءبىر اۋماققا تۇراقتى تۇرۋعا كەلگەندەر جانە قايتىس بولعاندار مەن وسى اۋماققا كوشىپ كەتكەندەر سانى شەگەرىلەدى، وسى اۋماقتاعى تۇراقتى تۇرۋى شەگەرىلەدى»، - دەپ ءتۇسىندىردى ۇلتتىق ستاتيستيكا بيۋروسى.
ايتا كەتەيىك، 2022 جىلى قازاقستان حالقى 261 845 ادامعا ءوستى.
