قازاق ايەلى 4 جىل وتباسىمەن بىرگە سيريادا بولىپ، ونداعى سۇمدىقتى كوزىمەن كورگەن
"جۋسان" وپەراتسياسىنىڭ ارقاسىندا ەلگە ورالعان 33 جاستاعى قازاق ايەلى سيرياعا قالاي تاپ بولعانىن اڭگىمەلەپ بەردى، دەپ حابارلايدى Sputnik قازاقستان ءتىلشىسى.
"2009 جىلى ناماز وقي باستادىم. 1,5 جىلدان كەيىن ناماز وقيتىن جىگىتكە تۇرمىسقا شىقتىم. ول دۇرىس جولدا ەكەن دەپ ويلادىم. كۇيەۋىم مەنى وزىنە تارتا باستادى. ياعني "جيھاد" ماسەلەسىن قوزعاپ، ناماز وقىمايتىنداردى "كاپىر" دەپ، ءوزىنىڭ دىنگە كوزقاراسىن اشىق ءبىلدىردى. مەن جيھاد دەگەن نە ەكەنىن تۇسىنگەن جوقپىن. بىراق مەندە ناماز وقىمايتىندار "مۇسىلمان ەمەس" دەگەن تۇسىنىك قالىپتاسا باستادى", - دەدى ول سىرتقى ىستەر مينيسترلىگىندە وتكەن بريفينگتە.
ونىڭ ايتۋىنشا، 2012 جىلى كۇيەۋى ۋكرايناعا جۇمىسقا كەتىپ، ءبىر ايدان كەيىن ودان حابار كەلگەن.
"كۇيەۋىم ءوزى حابارلاستى دا "ەكەۋمىزدىڭ ءجانناتتا بولعانىمىزدى قالايمىن" دەدى. سوندا عانا ونىڭ قايدا كەتكەنىن ءتۇسىندىم. كۇيەۋىمنىڭ ارتىنان بارۋعا شەشىم قابىلدادىم. سول جاققا بارىپ-قايتۋعا بيلەت الدىم. ويتكەنى ول كەزدە 8 جاستاعى قىزىم بولدى. ول قازاقستاندا قالىپ قويدى", - دەدى اتى-ءجونىن ايتۋدى ءجون كورمەگەن كەلىنشەك.
سونداي-اق ول العاشىندا كۇيەۋىن ەلگە قايتارامىن دەگەن وي بولعانىن ايتتى.
"سودان تۇركياعا جول تارتتىم. ول مەنى سوندا كۇتىپ الدى. كەيىن شەكارادان وڭاي وتتىك. وندا تەمىر قورشاۋلار بولعان جوق. ءبىر اۋىلعا كەلدىك. مەن سيرياعا كەلگەندە ادامدار قارۋ-جاراقپەن ءجۇردى. ول ءتۇن مەزگىلى ەدى. ءبىز "سيرياعا كەلگەن سياقتىمىز عوي؟" دەدىم. كۇيەۋىم ء"يا" دەپ جاۋاپ بەردى. ول جەردە ءبىر اپتا بولدىم. كەيىن جۇبايىما ۇيگە قايتاتىنىمدى ايتتىم. سول ۋاقىتتا ول مەنىڭ تولقۇجاتىمدى تارتىپ الدى دا، "ولار سەنىڭ قايدا بولعانىڭدى ءبىلىپ وتىر. سەن تۇرمەگە وتىراسىڭ" دەدى. سودان قورقىپ، كۇيەۋىمنىڭ ايتقانىنان شىعا المادىم", - دەيدى ول.
سيريادا ايەلدەردىڭ قۇقى اياققا تاپتالادى
33 جاستاعى قازاق ايەلى 2013 جىلدان 2017 جىلعا دەيىن دايش-تىڭ باقىلاۋىنداعى سيريا اۋماعىندا كۇيەۋىمەن تۇرعان. سوندا ءبىر بالاسىن دۇنيەگە اكەلگەن. كەيىن كۇيەۋى قايتىس بولعان سوڭ، امالىن تاۋىپ، كۇرتتەردىڭ يەلىگىندەگى اۋماققا ءوتىپتى.
اڭگىمە بارىسىندا ول سيرياداعى دايش باسقاراتىن اۋماقتا ايەلدەردىڭ قۇقى اياققا تاپتالعانىن جاسىرمادى.
"كۇيەۋىم 2017 جىلدىڭ 5 ناۋرىزىندا ومىردەن ءوتتى. قالاي قايتىس بولعانىن بىلمەيمىن. بومباعا ءتۇستى مە، بىرەۋ ءولتىردى مە، ونى ەشكىم ايتپايدى. سۋرەتىن دە كورسەتپەدى. سيريادا كۇيەۋى قايتىس بولعان ايەلدى ءبىر ۇيگە الىپ كەلەدى. ول جەردە تاماق، جارىق بولمايدى. ياعني ەشقانداي جاعداي جاسالماعان. امال جوق باسقا كۇيەۋگە شىعۋعا ءماجبۇر بولاسىڭ. ال كۇيەۋگە شىقپاساڭ، سول جەردە اشتان ولەسىڭ. ول كۇيەۋىڭ 2-3 كۇننەن قايتىس بولىپ كەتۋى مۇمكىن. ياعني، وسىلاي 5 رەت، 6 رەت، ءتىپتى 19 رەت كۇيەۋگە شىعىپ جاتقان ايەلدەر بولدى", - دەيدى ەلگە ورالعان كەلىنشەك.
سونىمەن قاتار وتانداسىمىز سيرياداعى قازاق ايەلدەرى ويىن اشىق ايتا الماي قينالعانىن جەتكىزدى.
"ول جاقتا قازاق قىزدارىمەن ارالاسىپ تۇردىق. كوبى "ۇيگە قايتقىم" كەلەدى دەپ ايتا الماي، ىشتەن تىنادى. "تەك كۇيەۋىممەن بىرگە ءجانناتتا بولعىم كەلەدى" دەيمىز. بىراق اركىمنىڭ ءوز ويى بار. مىسالى، مەن ەلگە قايتقىم كەلدى. بىراق ونى ايتا المادىم. ويتكەنى باسىمنان ايىرىلامىن. نە اتىپ تاستايدى، نە تۇرمەگە وتىرعىزادى", - دەيدى ول.
ول كۇرتتەر باسقاراتىن اۋماقتا 1,5 جىل تۇرعان. كەيىن "جۋسان" وپەراتسياسى بارىسىندا قازاقستانعا ورالىپتى.
