Qazaq áıeli 4 jyl otbasymen birge Sırııada bolyp, ondaǵy sumdyqty kózimen kórgen
"Jýsan" operaııasynyń arqasynda elge oralǵan 33 jastaǵy qazaq áıeli Sırııaǵa qalaı tap bolǵanyn áńgimelep berdi, dep habarlaıdy Sputnik Qazaqstan tilshisi.
"2009 jyly namaz oqı bastadym. 1,5 jyldan keıin namaz oqıtyn jigitke turmysqa shyqtym. Ol durys jolda eken dep oıladym. Kúıeýim meni ózine tarta bastady. Iaǵnı "jıhad" máselesin qozǵap, namaz oqymaıtyndardy "kápir" dep, óziniń dinge kózqarasyn ashyq bildirdi. Men jıhad degen ne ekenin túsingen joqpyn. Biraq mende namaz oqymaıtyndar "musylman emes" degen túsinik qalyptasa bastady", - dedi ol syrtqy ister mınıstrliginde ótken brıfıngte.
Onyń aıtýynsha, 2012 jyly kúıeýi Ýkraınaǵa jumysqa ketip, bir aıdan keıin odan habar kelgen.
"Kúıeýim ózi habarlasty da "ekeýmizdiń jánnatta bolǵanymyzdy qalaımyn" dedi. Sonda ǵana onyń qaıda ketkenin túsindim. Kúıeýimniń artynan barýǵa sheshim qabyldadym. Sol jaqqa baryp-qaıtýǵa bılet aldym. Óıtkeni ol kezde 8 jastaǵy qyzym boldy. Ol Qazaqstanda qalyp qoıdy", - dedi aty-jónin aıtýdy jón kórmegen kelinshek.
Sondaı-aq ol alǵashynda kúıeýin elge qaıtaramyn degen oı bolǵanyn aıtty.
"Sodan Túrkııaǵa jol tarttym. Ol meni sonda kútip aldy. Keıin shekaradan ońaı óttik. Onda temir qorshaýlar bolǵan joq. Bir aýylǵa keldik. Men Sırııaǵa kelgende adamdar qarý-jaraqpen júrdi. Ol tún mezgili edi. Biz "Sırııaǵa kelgen sııaqtymyz ǵoı?" dedim. Kúıeýim "ıá" dep jaýap berdi. Ol jerde bir apta boldym. Keıin jubaıyma úıge qaıtatynymdy aıttym. Sol ýaqytta ol meniń tólqujatymdy tartyp aldy da, "Olar seniń qaıda bolǵanyńdy bilip otyr. Sen túrmege otyrasyń" dedi. Sodan qorqyp, kúıeýimniń aıtqanynan shyǵa almadym", - deıdi ol.
Sırııada áıelderdiń quqy aıaqqa taptalady
33 jastaǵy qazaq áıeli 2013 jyldan 2017 jylǵa deıin DAISh-tyń baqylaýyndaǵy Sırııa aýmaǵynda kúıeýimen turǵan. Sonda bir balasyn dúnıege ákelgen. Keıin kúıeýi qaıtys bolǵan soń, amalyn taýyp, kúrtterdiń ıeligindegi aýmaqqa ótipti.
Áńgime barysynda ol Sırııadaǵy DAISh basqaratyn aýmaqta áıelderdiń quqy aıaqqa taptalǵanyn jasyrmady.
"Kúıeýim 2017 jyldyń 5 naýryzynda ómirden ótti. Qalaı qaıtys bolǵanyn bilmeımin. Bombaǵa tústi me, bireý óltirdi me, ony eshkim aıtpaıdy. Sýretin de kórsetpedi. Sırııada kúıeýi qaıtys bolǵan áıeldi bir úıge alyp keledi. Ol jerde tamaq, jaryq bolmaıdy. Iaǵnı eshqandaı jaǵdaı jasalmaǵan. Amal joq basqa kúıeýge shyǵýǵa májbúr bolasyń. Al kúıeýge shyqpasań, sol jerde ashtan ólesiń. Ol kúıeýiń 2-3 kúnnen qaıtys bolyp ketýi múmkin. Iaǵnı, osylaı 5 ret, 6 ret, tipti 19 ret kúıeýge shyǵyp jatqan áıelder boldy", - deıdi elge oralǵan kelinshek.
Sonymen qatar otandasymyz Sırııadaǵy qazaq áıelderi oıyn ashyq aıta almaı qınalǵanyn jetkizdi.
"Ol jaqta qazaq qyzdarymen aralasyp turdyq. Kóbi "úıge qaıtqym" keledi dep aıta almaı, ishten tynady. "Tek kúıeýimmen birge jánnatta bolǵym keledi" deımiz. Biraq árkimniń óz oıy bar. Mysaly, men elge qaıtqym keldi. Biraq ony aıta almadym. Óıtkeni basymnan aıyrylamyn. Ne atyp tastaıdy, ne túrmege otyrǵyzady", - deıdi ol.
Ol kúrtter basqaratyn aýmaqta 1,5 jyl turǵan. Keıin "Jýsan" operaııasy barysynda Qazaqstanǵa oralypty.
