ماڭعىستاۋ وبلىسىنىڭ اسكەري بولىمىندە ءبىر سارباز قايتىس بولدى، دەپ حابارلايدى "ادىرنا".
اسكەرگە كەلىپ، وتان الدىنداعى بورىشى وتەيمىن دەگەن جاس سارباز اسقار اراشباي وتكەن كۇزدە تۇركىستان وبلىسىنان شاقىرىلعان. الايدا اسكەرگە ساۋ كەتكەن بالاسىن كورۋگە اسىققان اتا-انا ساربازدىڭ ءمايىتىن العان.
اسكەرگە شاقىرىلۋشى 25744 اسكەري بولىمىندە، ياعني تەڭىز جاياۋ اسكەرىنىڭ بولىمىندە شۇعىل قىزمەت اتقاردى.
"ول 2003 جىلى تۋعان، كوللەدجدەن كەيىن شۇعىل قىزمەتكە شاقىرىلدى. بىزگە حابارلاعانداي، تۋعان-تۋىستارى شىمكەنتتەن اقتاۋعا ۇشىپ بارادى. ءبىز نە بولعانىن ءالى بىلمەيمىز", - دەدى مارقۇمنىڭ تۋىسى.
تەڭىز جاياۋ اسكەرىنىڭ ءباسپاسوز قىزمەتى حابارلاعانداي، سارباز 30 قىركۇيەك كۇنى اقتاۋ گارنيزونىنىڭ ويماشى پوليگونىندا بەلگىسىز زاتتىڭ جارىلۋى سالدارىنان كوز جۇمعان.
جەدەل جاردەم قىزمەتى شاقىرىلعانىمەن ساربازدى قۇتقارۋ مۇمكىن بولماعان. ول اسكەري اۋرۋحاناعا بارار جولدا كوز جۇمعان. قر قك قۇرلىق اسكەرلەرىنىڭ ءباسپاسوز قىزمەتى ساربازدىڭ بيىل 20 جاسقا تولعانىن ايتادى.
"مارقۇمنىڭ اتى اسقار اراشباي. بيىل ول 20 جاسقا تولدى. ول وتكەن جىلدىڭ كۇزىندە كوللەدجدى بىتىرگەننەن كەيىن تۇركىستان وبلىسىنان اسكەرگە شاقىرىلدى. وقيعا ورنىنا "زاپاد" وڭىرلىك قولباسشىلىعى اسكەرلەرىنىڭ قولباسشىسى گەنەرال-مايور داۋلەت وسپانوۆ باستاعان كوميسسيا جىبەرىلدى",-دەپ حابارلادى.
ۆەدومستۆو 30 قىركۇيەكتە اقتاۋ گارنيزونىندا جۇمىس جۇرگىزۋ كەزىندە "باتىس" قولباسشىلىعىنىڭ وقۋ پوليگونىندا بەلگىسىز زاتتىڭ جارىلعانىن حابارلاپ وتىر. ناتيجەسىندە ءبىر اسكەري قىزمەتشى ءارتۇرلى دارەجەدە جاراقات الىپ، مەديتسينا قىزمەتكەرلەرىنىڭ كۇش-جىگەرىنە قاراماستان، اۋرۋحاناعا بارار جولدا قايتىس بولدى.
