نازارباەۆ ماسكەۋدەگى شەرۋگە قاتىسقان جالعىز شەتەلدىك باسشى
9 مامىر. ەكىنشى دۇنيەجۇزىلىك سوعىستا جەڭىسكە جەتكەن سوۆەت ارمياسىنىڭ جەڭىس كۇنى. ءبىز دە، تاۋەلسىز قازاقستان حالقى دا بۇل كۇندى قانعا سىڭگەن ءداستۇر بويىنشا الاۋلاتىپ-جالاۋلاتىپ اتاپ وتەمىز. بۇل دۇرىس تا شىعار. ويتكەنى، ەكىنشى دۇنيەجۇزىلىك سوعىستا قازاق دالاسىنان شىققان، قازاقتان شىققان، ەرەن ەرلىك جاساعان ازاماتتار از ەمەس. جاستارى جۇزگە تاياعان، جۇزدەن اسقان سول ازاماتتاردىڭ ءبىرسىپىراسى ارامىزدا ءجۇر. ءتىرى ءجۇر. ولار ەرلىكپەن قان كەشتى. مايدانعا كىردى. سوعىس كوردى. سوندىقتان ولاردىڭ باتىرلىعى اسپەتتەلۋى كەرەك تە شىعار...
ارامىزدا ءجۇر دەدىك قوي، بۇگىندە قازاقستاندا قانشا ارداگەر قالدى؟ رەسمي مالىمەتكە كوز جۇگىرتەيىك...
قازاقستاندا كوزى ءتىرى 1 425 مايدانگەر بار
2019 جىلعى 1 مامىرداعى مالىمەت بويىنشا، قازىر ەلىمىزدە ەكىنشى دۇنيەجۇزىلىك سوعىسقا تىكەلەي قاتىسقان 1 425 مايدانگەر تۇرادى. سونداي-اق، لەنينگراد بلوكاداسىندا بولعان، تىلدا ەڭبەك ەتكەن، كونتسلاگەرلەردە بولعان (كامەلەت جاسىنا تولماعان) تۇتقىنداردى قوسا ەسەپتەگەندە 87 مىڭ ارداگەر بار.
ولارعا مەملەكەت بيۋدجەتىنەن بەرىلەتىن بىرجولعى اقشالاي كومەك تە جوق ەمەس. مىسالى:
شىعىس قازاقستان وبلىسى – 542 مىڭ;
نۇر-سۇلتان قالاسى – 519 مىڭ;
اقمولا وبلىسى – 500 مىڭ;
پاۆلودار وبلىسى – 500 مىڭ;
قاراعاندى وبلىسى – 300 مىڭ،
اتىراۋ وبلىسى – 300 مىڭ;
اقتوبە وبلىسى – 300 مىڭ;
باتىس قازاقستان وبلىسى – 300 مىڭ;
ماڭعىستاۋ وبلىسى – 250 مىڭ;
سولتۇستىك قازاقستان وبلىسى – 250 مىڭ;
تۇركىستان وبلىسى – 250 مىڭ;
الماتى قالاسى – 250 مىڭ;
شىمكەنت قالاسى – 250 مىڭ;
قىزىلوردا وبلىسى – 202 مىڭ;
قوستاناي وبلىسى – 150 مىڭ;
جامبىل وبلىسى – 150 مىڭ.
سوعىس ارداگەرلەرىنە 2,6 ميلليارد تەڭگە ماتەريالدىق كومەك قاراستىرىلعان
ەكىنشى دۇنيەجۇزىلىك سوعىس ارداگەرلەرىنە بىرجولعى بەرىلەتىن اقشالاي كومەك مولشەرىن جەرگىلىكتى اكىمدىكتەر وزدەرى بەلگىلەگەن. ال قر ەڭبەك جانە حالىقتى الەۋمەتتىك قورعاۋ مينيسترلىگى 2019 جىلى ارداگەرلەرگە بەرىلەتىن مۇنداي كومەك مولشەرىن كەم دەگەندە 300 مىڭ تەڭگەگە جەتكىزۋگە كەڭەس بەرگەن بولاتىن.
جەڭىستىڭ 74 جىلدىعىنا وراي 88 862 ارداگەرگە بيۋدجەتتەن جالپى سوماسى 2,6 ميلليارد تەڭگەگە ماتەريالدىق كومەك قاراستىرىلعان.
ءجا، سونىمەن ۋلاپ-شۋلاپ ءجۇرىپ بۇل داتانى دا وتكەردىك. رەسپۋبليكالىق ماسششتابتا اتالىپ ءوتىلدى. رەسمي، بەيرەسمي شەرۋلەر ءوتتى. دۋمانداتقان كونتسەرتتەر بەرىلدى. پرەزيدەنت توقاەۆ رەسمي قۇتتىقتاۋ جاسادى.
كرەمل يدەولوگياسىنىڭ ءبىر ۇشقىنى سانالاتىن «ولمەيتىندەردىڭ شەرۋى» دە ءوتتى. باس قالا باستاپ، قالعاندارى قوشتاپ، «بەسسمەرتنىي پولك» شەرۋىن ءجۇرىپ ءوتتى. ونى دا كوردىك. كوردىك تە ۇلتتىق يدەولوگيانىڭ، اقوردا يدەولوگياسىنىڭ السىزدىگىنە كوز جەتكىزدىك. ولاي بولماسا، بەيبىت كۇندە قازاقتىڭ 3/1-ءىن قاساقانا قىرعان قاندىقول قاساپشى يوسيف ءستاليننىڭ پورترەتىن كوتەرىپ شەرۋلەتۋگە استە جول بەرىلمەس ەدى-اۋ...
ماسكەۋدەگى شەرۋ
كرەمل دەپ قالدىق قوي. 63 مەملەكەت قاتىسقان ەكىنشى دۇنيەجۇزىلىك سوعىستى رەسەي "مەنشىكتەپ" العان. ورىستاردا ەكى ۇلىق مەيرام بار، بىلەسىزدەر. ونىڭ ءبىرى – جاڭا جىل بولسا، ەكىنشىسى وسى – جەڭىس كۇنى. جەڭىس كۇنى قىزىل الاڭدا اسكەري پاراد وتكىزۋ كرەمل قوجايىنىنىڭ قاتقان قاعيداسى، اينىماس سالتىنا اينالعان. وسى سالتاناتتى شەرۋگە رەسەي ارمياسى ءبىر اي بۇرىن دايىندالادى. ءبىر اپتا قالعاندا باستان-اياق دايىندىقتى تەكسەرەدى. ءسويتىپ، 9 مامىر كۇنى ۆلاديمير پۋتين ءوز ارمياسىن كۇللى دۇنيە جۇزىنە داڭقتاپ، شەرۋ وتكىزەدى. ورىس قارۋىنىڭ كۇشىن كۇللى الەمگە كورسەتىپ ايبات شەگۋ بولسا، وزىنە كىرىپتار كورشىلەرىن قورقىتىپ الۋعا دا تاپتىرماس مۇمكىندىك.
بىلتىرعا دەيىن بۇل شەرۋدى تاماشالاۋعا رەسەيمەن وداقتاس، نيەتتەس ەلدەردىڭ باسشىلارى بىرىڭعاي بارىپ قاتىساتىن. قايسىبىر جىلى جەڭىستىڭ 70 جىلدىعىنا ماسكەۋ ايرىقشا دايىندالدى. الەمنىڭ 30-عا جۋىق ليدەرى كەلدى.
ال بيىل شە؟ بيىل ارنايى شاقىرتۋ العاندار از بولمادى. دەگەنمەن ماسكەۋگە بارعان جالعىز ادام – نۇرسۇلتان نازارباەۆ. ءيا، قازاقستاننىڭ بۇرىنعى پرەزيدەنتى نازارباەۆتان باسقالارى بۇل جولى بارمادى. نازارباەۆ بارعان شەرۋگە قازاقستان ارمياسىنىڭ وكىلدەرى قاتىسقان جوق. بۇل دا ءوز كەزەگىندە نازار اۋدارارلىق فاكت. ءجا، وسىمەن تامامدايىق.
«ادىرنا» ۇلتتىق پورتالى
