بۇگىن تارازدا «اۋىل» جاستارى وزگەرىستەردى قالايدى» تاقىرىبىندا جاستار فورۋمى ءوتءتى، دەپ حابارلايدى “ادىرنا” ۇلتتىق پورتالى.
رەسپۋبليكالىق رەفەرەندۋمدى ناسيحاتتاۋ جانە ءتۇسىندىرۋ ماقساتىندا ۇيىمداستىرىلعان جيىنعا پارتيانىڭ جامبىل وبلىسى بويىنشا فيليالىنىڭ توراعاسى ەربولات ساۋرىقوۆ، جەرگىلىكتى جاستار ساياساتى ماسەلەلەرى باسقارماسىنىڭ وكىلدەرى مەن بەلسەندى جاستار قاتىستى.
«ەل تاريحىنداعى ەلەۋلى وقيعاعا بەيجاي قاراماي بەلسەندى قاتىسۋ – ءاربىر ازاماتتىڭ باستى بورىشى. سەبەبى بۇل – بۇگىنگى قازاقستاننىڭ عانا ەمەس، كەلەشەك ۇرپاقتىڭ تاعدىرىنا تىكەلەي اسەر ەتەتىن ماڭىزدى ءسات. ەلىمىزدىڭ بولاشاعى تىكەلەي وسى رەفەرەندۋمعا بايلانىستى بولىپ وتىر. سول سەبەپتى ەل ءۇشىن جانى اشيتىن ءار ازامات وسى رەفەرەندۋمعا بەلسەندى تۇردە قاتىسادى دەپ ويلايمىن»، - دەدى فورۋمنىڭ اشىلۋىندا ءسوز العان ە.ساۋرىقوۆ.
ەلىمىزدىڭ مەملەكەتتىك باسقارۋ جۇيەسىن وزگەرتىپ، ساياسي احۋالعا جاڭا دەم بەرەتىن كونستيتۋتسيالىق رەفەرەندۋم – مەملەكەتتىڭ ءاربىر ازاماتىنا ۇلكەن جاۋاپكەرشىلىك جۇكتەپ قانا قويماي، الداعى كۇنگە ماڭىزدى قادام جاساۋعا جەتەلەيدى.
فورۋمدا ستۋدەنت جاستار اتا زاڭعا ەنگىزىلەتىن وزگەرىستەر مەن تولىقتىرۋلار جوباسى بويىنشا رەسپۋبليكالىق رەفەرەندۋمدى قولداي وتىرىپ، پايىمدى پىكىرى مەن ورامدى ويلارىن ورتاعا سالدى. كونستيتۋتسياعا ەنگىزىلەتىن وزگەرىستەر مەن تولىقتىرۋلار جايلى، كونستيتۋتسيالىق رەفورمالاردىڭ تۇجىرىمدامالىق نەگىزدەرى مەن ەرەكشەلىكتەرى جانە رەفورمالاردىڭ نەگىزگى باعىتتارىن ءتۇسىندىرۋگە تىرىستى.
ەلدى باسقارۋ ىسىنە حالىقتىڭ قاتىسۋ مۇمكىندىگىن كەڭەيتۋ باعىتى بويىنشا حالىقارالىق تاراز يننوۆاتسيالىق ينستيتۋتىنىڭ ستۋدەنتى, رەسپۋبليكالىق جاستار بيزنەس-ستارتاپ جوباسىنىڭ جۇلدەگەرى ەراسىل بەردى ءوز پىكىرىن جەتكىزدى.
سونداي-اق، پارتيا جاستار قاناتىنىڭ بەلسەندى مۇشەسى, دزيۋدو جانە قازاق كۇرەسىنەن سپورت شەبەرىنە ۇمىتكەر، الەم چەمپيوناتىنىڭ جانە حالىقارالىق تۋرنيرلەردىڭ جۇلدەگەرى جانسايا ىنتىقباي دا ءسوز سويلەدى.
«جاڭا قازاقستانعا» قادام باسۋدا ءبارىمىز ءبىر كىسىدەي جۇمىلساق قانا ءوزىمىز قالاعانداي مەملەكەت قۇرا الامىز. ونىڭ جارقىن بولاشاعى ءۇشىن جۇدىرىقتاي جۇمىلىپ ەڭبەك ەتۋ – ءاربىرىمىزدىڭ پەرزەنتتىك بورىشىمىز»، - دەپ ويىن قورىتىندىلادى ول.
ال جاستار ۇيىمدارىنىڭ كوشباسشىسى قاتارىندا جۇرگەن, رەسپۋبليكالىق عىلىمي جوبالار جەڭىمپازى دانابەك مۇراتوۆ رەفەرەندۋمدا وزگەرىس ەنگىزۋ بويىنشا باسىم داۋىس كورسەتكىشى بولعان جاعدايدا قانداي وزگەرىستەر بولاتىنى جونىندە كەڭىرەك توقتالدى.
“اتا زاڭىمىز 30%-عا وزگەرەدى. ياعني ۇشتەن ءبىرى. بۇل وتە ۇلكەن وزگەرىستەر اكەلەدى دەگەن ءسوز. ونىڭ باستىلارىنىڭ ءبىرى – جەر مەن ونىڭ بايلىعى تىكەلەي حالىققا تيەسىلى بولۋى، تابيعي رەسۋرستار حالىقتىڭ مەنشىگى رەتىندە زاڭدىق تۇرعىدا بەكىتىلۋى، پرەزيدەنت وكىلەتتىگىنىڭ وزگەرۋى، ماجىلىستەگى دەپۋتاتتار سانىنىڭ قىسقارۋى سەكىلدى ماڭىزدى باعىتتار قامتىلماق. بۇل تاۋەلسىز قازاقستان تاريحىندا العاش رەت بولعالى تۇرعان ساياسي ناۋقان. مۇنداي ساتتە ەشكىم دە ەلدىڭ كەلەشەگى ءۇشىن تىس قالىپ، سىرت اينالماۋى ءتيىس، - دەپ ءسوزىن تۇيىندەدى.
سونداي-اق، جامبىلدىق «اۋىل» جاستارى ەلىمىزدىڭ بارلىق ازاماتتارى مەن جاستارىنا ۇندەۋ جولداپ، بەلسەندىلىك تانىتاتىندىقتارىن جەتكىزدى.
جاستار «ءبىز جاڭا ءادىل قازاقستاندى بىرگە وركەندەتەمىز، بىرگە قۇرامىز!» ۇرانىمەن تارقاسىپ، جۇرتشىلىقتى 5 ماۋسىم كۇنى وتەتىن رەفەرەندۋمعا داۋىس بەرۋگە شاقىردى.
”ادىرنا” ۇلتتىق پورتالى
