ۋكراينا العاش رەت امەريكالىق ATACMS زىمىراندارى ارقىلى رەسەي اۋماعىنا سوققى بەردى. بۇل تۋرالى بۇگىن، 19 قاراشادا بىرنەشە باق جازدى، دەپ حابارلايدى “ادىرنا” ۇلتتىق پورتالى.
ربك-ۋكراينا باسىلىمى بريانسك وبلىسىنداعى كاراچەۆ قالاسىنىڭ ماڭىنداعى اسكەري نىساننىڭ سوققىعا جىعىلعانىن جازدى. بۇل قالا ۋكراينا شەكاراسىنان 130 شاقىرىم جەردە ورنالاسقان.
ال Astra Telegram ارناسىنىڭ حابارلاۋىنشا، كاراچەۆ قالاسىنىڭ تۇرعىندارى اسكەري بازاعا شابۋىل جاسالعانى تۋرالى حابارلاعان. ارنا كۋاگەرلەر جىبەرگەن جانە «جارىلۋ جارقىلىن» بەينەلەيتىن بىرنەشە ۆيدەو جاريالادى.
«گراۋ-نىڭ 67-ارسەنالى» (55443 اسكەري ءبولىمى) كاراچەۆتە ورنالاسقان.
ۋكراينا قارۋلى كۇشتەرىنىڭ باس شتابى سونداي-اق Telegram-دا «2024 جىلعى 19 قاراشاعا قاراعان ءتۇنى ۋكراينا قارۋلى كۇشتەرىنىڭ بولىمشەلەرى قورعانىس كۇشتەرىنىڭ باسقا قۇرامداس بولىكتەرىمەن بىرلەسىپ، 1046-ارسەنالعا وق جاۋدىردى» دەلىنگەن.
«بۇگىن تۇنگى ساعات 02.30-داعى جاعداي بويىنشا نىسانالى ايماقتا 12 رەتتىك جارىلىس تىركەلدى، رەسەي فەدەراتسياسىنىڭ ۋكرايناعا قارسى قارۋلى اگرەسسياسىن توقتاتۋ ماقساتىندا رەسەيلىك باسقىنشىلار ارمياسىنىڭ وق-ءدارى قويمالارىن جويۋ جۇمىستارى جالعاسادى»، - دەلىنگەن حابارلامادا.
جاريالانعان كەزدە رەسەيلىك تاراپتان ۋكراينا قارۋلى كۇشتەرى ATACMS زىمىراندارى ارقىلى رەسەي اۋماعىنا سوققى بەرىپ جاتقانى تۋرالى رەسمي راستاۋ بولعان جوق.
رەسەي قورعانىس مينيسترلىگى Telegram-ارناسىندا 19 قاراشاعا قاراعان ءتۇنى بريانسك وبلىسىنىڭ اۋماعىندا كەزەكشى اۋە شابۋىلىنا قارسى قورعانىس جۇيەلەرى ارقىلى ءتورت ۋكرايندىق ۇشقىشسىز ۇشاق جويىلعانى عانا جازىلعان. بريانسك وبلىسىنىڭ گۋبەرناتورى الەكساندر بوگومازدىڭ جەدەلحاتىنداعى حابارلارعا قاراعاندا، وبلىس اۋماعىندا ساعات 8.00-دە بارلىعى 13 ۇشقىشسىز ۇشۋ اپپاراتى اتىپ تۇسىرىلگەن.
«قۇربان بولعاندار مەن زارداپ شەككەندەر جوق»، - دەيدى ول.
