ءبىلىم ءمينيسترى: ەڭ ءبىرىنشى ماسەلە – قازاق ءتىلىن وقىتۋ

ءبىلىم وردالارى اعىلشىن تىلىندە ساباق بەرۋگە مەكتەپ تولىعىمەن دايىن بولعان جاعدايدا عانا كوشەدى. بۇل تۋرالى بۇگىن ءبىلىم جانە عىلىم ءمينيسترى كۇلاش ءشامشيدينوۆا ايتتى، دەپ حابارلايدى Sputnik قازاقستان تىلشىسى.

ۇكىمەتتە وتكەن ءباسپاسوز ءماسليحاتىندا ءبىلىم ءمينيسترى ۇشتىلدىلىك ماسەلەسىنە توقتالدى.

"ەڭ ءبىرىنشى ماسەلە – قازاق ءتىلىن وقىتۋ. ەكىنشى ورىس ءتىلى، اعىلشىن ءتىلى. تىلدەردى وقىتۋ دەڭگەيگە بايلانىستى ءتورت داعدىنى دامىتۋعا باعىتتالادى. ياعني، ول تىڭداۋ، ايتۋ، سويلەۋ جانە جازۋ. سوندىقتان بالالارعا اعىلشىن تىلىندە ساباق بەرۋ تەك 10 جانە 11 سىنىپتا، بالانىڭ تىلدىك قابىلەتى جەتكىلىكتى بولعان جاعدايدا جانە مەكتەپ دايىن بولعاندا مەكتەپتىڭ شەشىمىمەن جۇرەتىن بولادى", - دەدى ءشامشيدينوۆا.

ونىڭ ايتۋىنشا، قازىر 153 مەكتەپ اعىلشىن تىلىندە ساباق بەرۋ باعدارلاماسىنا كوشكەن. ءبىلىم مينيسترلىگى بۇل وقۋ ورىندارىنا مونيتورينگ جاساپ وتىر.

"وسى مونيتورينگتىڭ ناتيجەسىندە وقۋشىلار مەن ۇستازدارعا قيىندىق كەلتىرگەن ماسەلەلەر انىقتالىپ، بولاشاقتا باسقا مەكتەپتەرگە كومەك رەتىندە بەرىلەتىن بولادى", دەدى مينيستر.سونىمەن قاتار، ءشامشيدينوۆا ەلىمىزدەگى اپاتتى جانە ءۇش اۋىسىمدىق مەكتەپتەردىڭ ماسەلەسى قالاي شەشىلەتىنىن ايتتى.

"الداعى ءۇش جىلدا 190 مەكتەپ سالىنادى. ونىڭ 89-ى ءۇش اۋىسىمدىق، 13-ءى اپاتتى، 72-ءسى ورىن تاپشىلىعى بار مەكتەپتەردىڭ ماسەلەسىن شەشەدى", - دەدى ول.

ءمينيستردىڭ ايتۋىنشا، بولاشاقتا مەكتەپ قۇرىلىسىنا اقشا بالا سانىنا بايلانىستى بولىنەدى. ءبىلىم ورداسىنىڭ قايدا جانە قالاي سالىناتىنىن جەرگىلىكتى اتقارۋشى ورگاندار شەشەدى.

ءشامشيدينوۆا تاۋەلسىزدىك جىلدارى ىشىندە ەلىمىزدە 1672 مەكتەپ بوي كوتەرگەنىن تىلگە تيەك ەتتى. ايتۋىنشا، ورتا ءبىلىمنىڭ ينفراقۇرىلىمى ءبىرىنشى كەزەكتە ءۇش اۋىسىمدىق، اپاتتى جانە ورىن تاپشىلىعى بار مەكتەپتەردىڭ ماسەلەسىن شەشەتىن بولادى.