Bilim mınıstri Kúlásh Shámshıdınova mektepter aǵylshyn tilinde sabaq berýge qandaı jaǵdaıda kóshetinin aıtty
Bilim ordalary aǵylshyn tilinde sabaq berýge mektep tolyǵymen daıyn bolǵan jaǵdaıda ǵana kóshedi. Bul týraly búgin bilim jáne ǵylym mınıstri Kúlásh Shámshıdınova aıtty, dep habarlaıdy Sputnik Qazaqstan tilshisi.
Úkimette ótken baspasóz máslıhatynda bilim mınıstri úshtildilik máselesine toqtaldy.
"Eń birinshi másele – qazaq tilin oqytý. Ekinshi orys tili, aǵylshyn tili. Tilderdi oqytý deńgeıge baılanysty tórt daǵdyny damytýǵa baǵyttalady. Iaǵnı, ol tyńdaý, aıtý, sóıleý jáne jazý. Sondyqtan balalarǵa aǵylshyn tilinde sabaq berý tek 10 jáne 11 synypta, balanyń tildik qabileti jetkilikti bolǵan jaǵdaıda jáne mektep daıyn bolǵanda mekteptiń sheshimimen júretin bolady", - dedi Shámshıdınova.
Onyń aıtýynsha, qazir 153 mektep aǵylshyn tilinde sabaq berý baǵdarlamasyna kóshken. Bilim mınıstrligi bul oqý oryndaryna monıtorıng jasap otyr.
"Osy monıtorıngtiń nátıjesinde oqýshylar men ustazdarǵa qıyndyq keltirgen máseleler anyqtalyp, bolashaqta basqa mektepterge kómek retinde beriletin bolady", dedi mınıstr.Sonymen qatar, Shámshıdınova elimizdegi apatty jáne úsh aýysymdyq mektepterdiń máselesi qalaı sheshiletinin aıtty.
"Aldaǵy úsh jylda 190 mektep salynady. Onyń 89-y úsh aýysymdyq, 13-i apatty, 72-si oryn tapshylyǵy bar mektepterdiń máselesin sheshedi", - dedi ol.
Mınıstrdiń aıtýynsha, bolashaqta mektep qurylysyna aqsha bala sanyna baılanysty bólinedi. Bilim ordasynyń qaıda jáne qalaı salynatynyn jergilikti atqarýshy organdar sheshedi.
Shámshıdınova táýelsizdik jyldary ishinde elimizde 1672 mektep boı kótergenin tilge tıek etti. Aıtýynsha, orta bilimniń ınfraqurylymy birinshi kezekte úsh aýysymdyq, apatty jáne oryn tapshylyǵy bar mektepterdiń máselesin sheshetin bolady.
