قازاقستاندا 1929-1956 جىلدار ارالىعىنداعى ساياسي قۋعىن-سۇرگىن قۇرباندارىنا قاتىستى 2,4 ميلليوننان استام مۇراعات كارتوچكالارى مەملەكەتتىك قۇپيا قاتارىنان شىعارىلدى. بۇل تۋرالى باس پروكۋراتۋرا مالىمدەدى، دەپ حابارلايدى “ادىرنا” ۇلتتىق پورتالى.
مالىمەت بويىنشا، 251 مىڭ ارنايى قونىس اۋدارىلعانداردىڭ ءىسى پرەزيدەنت مۇراعاتىنا وتكىزىلدى، كەيىننەن ولار مۇددەلى تۇلعالارعا قولجەتىمدى بولادى.
265 مىڭ ءىس جىل سوڭىنا دەيىن سوندا وتكىزىلەدى.
311 مىڭ ادام ءماجبۇرلى، ارنايى قونىس اۋدارىلعاندار جانە قىلمىستىق جاۋاپكەرشىلىككە تارتىلعاندار قاتارىنان اقتالدى، - دەلىنگەن ۆەدومستۆو مالىمەتىندە.
ايتا كەتەيىك، 2020 جىلعى 24 قاراشادا قازاقستان پرەزيدەنتى قاسىم-جومارت توقاەۆ ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيا قۇرۋ تۋرالى جارلىققا قول قويدى. كوميسسيانىڭ 2020 جىلعى 3 جەلتوقسانداعى ءبىرىنشى وتىرىسىندا ونىڭ توراعاسى، قر مەملەكەتتىك حاتشىسى قىرىمبەك كوشەرباەۆ كوميسسيانىڭ نەگىزگى مىندەتى «كەڭەس ساياسي قۋعىن-سۇرگىن قۇرباندارىنىڭ بارلىق ساناتتارى ءۇشىن تاريحي ادىلەتتىلىكتى قالپىنا كەلتىرۋ كەزەڭى» دەپ مالىمدەدى.
2023 جىلدىڭ قاڭتارىندا قازاقستان رەسپۋبليكاسىنىڭ مەملەكەتتىك كەڭەسشىسى ەرلان قارين توقاەۆقا ساياسي قۋعىن-سۇرگىن قۇرباندارىنىڭ تاريحىنا ارنالعان 31 تومدىق قۇجاتتار مەن ماتەريالداردى تابىس ەتتى.
