استانادا قازاقستاندىقتار تاجىكستان ەلشىلىگىنىڭ الدىنا گۇلدەر مەن بالالار ويىنشىقتارىن قويىپ، ۇلىنان ايىرىلعان وتباسىعا كوڭىل ايتۋدا، دەپ حابارلايدى "ادىرنا".
مۇنداي قادامعا 16 جەلتوقساندا ماسكەۋ وبلىسىندا بولعان قايعىلى وقيعا سەبەپ بولعان. وندا مەكتەپ وقۋشىسى پىشاقپەن تاجىك وتباسىنان شىققان 10 جاستاعى قوبيلجوندى پىشاقتاپ ولتىرگەن.
قازاقستان تۇرعىندارى مارقۇم بالانىڭ جاقىندارىنا قولداۋ ءبىلدىرىپ، ونىڭ رۋحىنا تاعزىم ەتۋ ماقساتىندا ەلشىلىككە كەلۋدى ۇيعارعان. بۇل باستاما الەۋمەتتىك جەلىلەردە، اتاپ ايتقاندا Threads پلاتفورماسىندا كوتەرىلگەن. ەلشىلىك الدىنا جينالۋعا شاقىرعان جازبا 10 مىڭعا جۋىق لايك جيناعان.
«بالا قازا تاپتى. اناسى جالعىز قالدى. بۇل وتە قورقىنىشتى. Threads-ءتىڭ كۇشىنە سەنەمىن. ءار ەلدەگى تاجىكستان ەلشىلىگىنە بارىپ، بالانىڭ رۋحىنا تاعزىم ەتەيىك. رەپوست سۇرايمىن»، — دەپ جازدى mirazhaxylyk ەسىمدى قولدانۋشى.
قازىرگى تاڭدا تاجىكستان ەلشىلىگى جاعدايعا كەدەرگى كەلتىرمەي، تەك باقىلاپ وتىر. وقيعا ورنىندا پوليتسيا قىزمەتكەرلەرى قوعامدىق ءتارتىپتى قامتاماسىز ەتۋدە.
