مەملەكەتتىك ورگاندار وبلىس كاسىپكەرلەرىنىڭ قۇقىعىن قورعاۋ جونىندەگى كەڭەستە ايتىلعان ۇسىنىمداردىڭ باسىم بولىگىن قابىلدادى. بيزنەستەگى وزەكتى ماسەلەلەر وڭىرلىك كاسىپكەرلەر پالاتاسى جانىنان جۇمىس ىستەيتىن كاسىپكەرلەردىڭ قۇقىقتارىن قورعاۋ جانە سىبايلاس جەمقورلىققا قارسى ءىس-قيمىل جونىندەگى كەڭەس وتىرىسى شەڭبەرىندە تالقىلاندى.
اتالعان جيىندا كاسىپكەرلەردىڭ ءوتىنىشى بىرنەشە ماسەلە توڭىرەگىندە قارالدى. العاشقى كەزەكتە «نۇر» جەكە كاسىپكەرلىگىنىڭ ءوتىنىشى نازارعا الىندى. وندا كاسىپكەر اسەل جاپارقۇلوۆا جەرگىلىكتى اتقارۋشى ورگانداردىڭ وعان ەكى قاباتتى ساۋدا ورتالىعىن سالۋ ءۇشىن اۋدانى 350 شارشى مەتر جەر ۋچاسكەسىن بەرۋدەن باس تارتۋىنا قۇقىقتىق باعا بەرۋدى سۇرادى. ىسكەر ايەلدەن باس تارتا وتىرىپ، ۇشتوبە قالاسىنىڭ اكىمدىگى اسەل جاپارقۇلوۆا تالاپ ەتكەن ۋچاسكە اۋكتسيون ارقىلى ءوتۋى ءتيىس ەكەنىن ەسكەرتكەن.
بۇل پروبلەمالىق ماسەلە كاسىپكەرلەر پالاتاسى، پروكۋراتۋرا، ەكونوميكالىق تەرگەۋ دەپارتامەنتى، جەرگىلىكتى اتقارۋشى ورگان وكىلدەرىنىڭ قاراتال اۋدانى بيزنەس-قوعامداستىعىمەن كوشپەلى كەزدەسۋىندە تالقىلانىپتى.
سودان كەيىن زاڭگەرلەر كاسىپكەردىڭ ۇشتوبە قالاسىنىڭ اكىمدىگىنە قايتا جۇگىنۋ كەرەك ەكەنىن العا تارتقان. ءسويتىپ، جەرگىلىكتى اتقارۋشى ورگاندار تاراپىنان اسەل جاپارقۇلوۆاعا ۋچاسكە ساۋدا-ساتتىق ارقىلى بەرىلۋى ءتيىس دەگەن جاۋاپ قايتارىلعان. الايدا «نۇر» جەكە كاسىپكەرلىگىنىڭ اۋكتسيونعا قاتىسۋ قۇقىعىنىڭ قالاي ىسكە اسىرلاتىنى تۇسىندىرىلمەپتى. وسىعان بايلانىستى كەڭەستە «قاراتال اۋدانى ۇشتوبە قالاسى اكىمىنىڭ اپپاراتى» مم-ءىڭ كاسىپكەرگە جەر ۋچاسكەسىن بەرۋگە ارنالعان ساۋدا-ساتتىققا قاتىسۋعا بايلانىستى تولىق تۇسىنىك بەرۋ ۇسىنىلدى.
«سوكباەۆ-م» شارۋا قوجالىعى باسشىسى مارات سوكباەۆ وڭىرلىك پالاتاعا جولداۋى «قازسۋشار» مكك قىزىلشا ەگۋ ءۇشىن القاپتاردى سۋارۋعا بايلانىستى شارت جاساسۋدان باس تارتۋدان تۋىنداعان. كاسىپكەر جولداعان وتىنىشكە قاتىستى كاسىپكەرلەردىڭ قۇقىقتارىن قورعاۋ جانە سىبايلاس جەمقورلىققا قارسى ءىس-قيمىل جونىندەگى كەڭەستە كاسىپكەردىڭ ەگىس ۋچاسكەسىن كورۋ ءۇشىن كوميسسيا قۇرۋ قاجەت ەكەنى ايتىلعان.
تاعى ءبىر ماسەلە مەملەكەتتىك ساتىپ الۋ سالاسىنا قاتىستى بولدى. تەندەردى اۋماقتىق پوليتسيا دەپارتامەنتى جاريالاعان، ال كاسىپكەر تاپسىرىس بەرۋشىدەن جاۋاپ الا الماۋدىڭ سالدارىنان وڭىرلىك كاسىپكەرلەر پالاتاسىنا جۇگىنگەن، سول سەبەپتى بيزنەس وكىلىنىڭ ساۋالىنا وبلىستىق پوليتسيا دەپارتامەنتى جاۋاپ بەرۋى ءتيىس ەكەنى ۇسىنىلدى. كاسىپكەرلەردىڭ قۇقىقتارىن قورعاۋ جانە سىبايلاس جەمقورلىققا قارسى ءىس-قيمىل جونىندەگى كەڭەس سوڭىندا وبلىستىق كاسىپكەرلەر پالاتاسىنىڭ توراعاسى داۋرەن وڭالباەۆ اتالعان كەڭەستىڭ كاسىپكەرلەر قۇقىعىن قورعاۋداعى تيىمدىلىكتىڭ ماڭىزىن اتاپ، وي قورىتتى.
ايتا كەتەيىك، وڭىرلىك پالاتانىڭ دەرەكتەرى بويىنشا وتكەن سەگىز ايدا ۋاكىلەتتى ورگانداردىڭ اتىنا جىبەرىلگەن 50 ۇسىنىمنىڭ 90 پايىزى مەملەكەتتىك ورگاندارمەن قابىلدانعان.
