تاۋەلسىزدىك كۇنى قارساڭىندا جەتىسۋ وبلىسىندا جەرگىلىكتى مادەنيەت مەكەمەلەرىنە اۆتوكولىكتەر بەرىلدى. وبلىس اكىمىنىڭ اتىنان تەحنيكا كىلتتەرىن ورىنباسارى دياس ەسداۋلەتوۆ تابىستادى.
تالدىقورعانداعى ورتالىق الاڭدا وتكەن سالتاناتتى شارادا ءوڭىر باسشىسىنىڭ ورىنباسارى مادەنيەت قىزمەتكەرلەرىنىڭ جەتىسۋدىڭ ونەرىن ورىستەتۋگە، حالىقتىڭ رۋحاني دامۋىنا قوسىپ وتىرعان ۇلەسىن ەرەكشە اتاپ ءوتتى.
"مادەنيەت سالاسى ماماندارىنىڭ الاڭسىز جۇمىس ىستەۋىنە جاعداي جاساۋ، مادەنيەت نىساندارىن ماتەريالدىق-تەحنيكالىق جاعىنان جۇيەلى تۇردە نىعايتۋ – ءبىزدىڭ باستى مىندەتىمىزدىڭ ءبىرى. بۇگىن سالانىڭ تەحنيكالىق بازاسىن شاعىن اۆتوبۋستارمەن جانە جۇك كولىكتەرىمەن تولىقتىرىپ وتىرمىز. بۇل كولىكتەر مادەنيەت ۇجىمدارىنىڭ گاسترولدىك ساپارلارعا شىعۋىنا، قاجەتتى قۇرال-جابدىقتار مەن دەكوراتسيالاردى تاسىمالداۋىنا، ءتۇرلى فەستيۆال، بايقاۋلارعا قاتىسۋىنا مۇمكىندىك تۋعىزىپ، جۇمىس ساپاسىنا وڭ اسەر ەتەدى دەپ سەنەمىز", - دەدى د. ەسداۋلەتوۆ مەكەمە باسشىلارىنا اۆتوكولىك كىلتتەرىن تاپسىردى.
اتاپ وتسەك، وسى كۇنى وبلىستاعى 8 اۋداندىق، 2 قالالىق مادەنيەت ۇيلەرىنە، س. سەيفۋللين اتىنداعى وبلىستىق امبەباپ كىتاپحاناسى، وبلىستىق ارحيۆ، كوركەمسۋرەت گالەرەياسى مەن حالىق شىعارماشىلىعى ورتالىعىنا جالپى سانى 13 گازەل، 1 جۇك كولىگى بەرىلدى.
جاڭا تەحنيكاعا يە بولعان مەكەمە ۇجىمدارىنىڭ اتىنان الاكول اۋداندىق زەينەپ قويشىباەۆا اتىنداعى مادەنيەت ءۇيىنىڭ ديرەكتورى وتان سماعۇلوۆ ءسوز سويلەپ، ريزاشىلىعىن ءبىلدىردى.
"بۇگىن جەتىسۋ ءوڭىرىنىڭ مادەنيەت سالاسى قىزمەتكەرلەرى ءۇشىن تاريحي كۇن دەۋگە بولادى. سالا نىساندارىنا ءبىر كۇندە وسىنشا كولىك بەرۋ وقيعاسى العاش رەت بولىپ تۇر. بۇل – ۇلتتىق قۇندىلىقتاردى ناسيحاتتاپ جۇرگەن ازاماتتارعا كورسەتىلىپ وتىرعان قامقورلىق، بىزگە شىعارماشىلىق سەرپىلىس بەرەتىن يگىلىكتى ءىس. ءبىر عانا ءبىزدىڭ الاكول اۋدانىندا 4 جاڭا مادەنيەت نىسانى سالىنىپ جاتىر، سونىڭ بىرەۋى جۋىردا پايدالانۋعا بەرىلەدى، 3-ەۋى كەلەسى جىلدىڭ ۇلەسىندە. الداعى ۋاقىتتا دا رۋحانيات ءۇشىن ەسەلى ەڭبەك ەتە بەرەمىز. جەتىسۋ ءوڭىرىنىڭ ونەرى مەن مادەنيەتى جاساي بەرسىن", - دەدى ول.
اتاپ وتسەك، بۇل يگى شارا بيىل ەكىنشى جىل قاتارىنان وتكىزىلگەن «جەر جانناتى - جەتىسۋ» وبلىستىق تەلەۆيزيالىق بايقاۋىنىڭ ماراپاتتاۋ سالتاناتىمەن جانە گالا كونتسەرتىمەن جالعاستى.
جالپى، جەتىسۋ وبلىسى قۇرىلعاننان بەرى مادەنيەت سالاسىنىڭ ينفراقۇرىلىمى 36,2 % جاڭارتىلدى. سوڭعى ءۇش جىلدا سالا مەكەمەلەرىنىڭ ماتەريالدىق بازاسىن نىعايتۋعا بيۋدجەتتەن
1 ملرد. تەڭگەدەن استام قاراجات ءبولىنىپ، مۋزىكالىق اسپاپتار، ساحنالىق كيىمدەر، كومپيۋتەرلىك جابدىقتار، باسقا دا قاجەتتىلىكتەر ساتىپ الىنعان. قازىر وبلىستا 300-دەن استام مادەنيەت، ارحيۆ مەكەمەلەرى جۇمىس ىستەيدى.
