ۇمىتكەرلەر ءتىل ەمتيحانىن قالاي تاپسىردى؟

1500

بۇگىن ورتالىق سايلاۋ كوميسسياسىنىڭ لينگۆيستيكالىق كوميسسياسى پرەزيدەنتتىككە ۇمىتكەر سەگىزىنشى ادام - جۇماتاي اليەۆتەن الىنعان ءتىل ەمتيحانىنىڭ قورىتىندىسىن جاريا ەتتى. ول 13 سويلەمنەن 19 قاتە جىبەرگەن ەكەن.

وسك جانىنان قۇرىلعان قر پرەزيدەنتتىگىنە ۇمىتكەردىڭ مەملەكەتتىك ءتىلدى مەڭگەرۋ دەڭگەيىن انىقتايتىن لينگۆيستيكالىق كوميسسيا بۇگىن ۇمىتكەرلىككە ۇمىتكەر جۇماتاي اليەۆ قازاق ءتىلىن ەركىن مەڭگەرمەگەن دەگەن قورىتىندى جاسادى.

«بۇگىن «حالىق دەموگرافياسى» قوعامدىق بىرلەستىگىنەن پرەزيدەنتتىككە ۇمىتكەر رەتىندە ۇسىنىلعان جۇماتاي اليەۆ ەمتيحانعا بەرىلگەن ۋاقىتىن تولىق پايدالاندى. كوميسسيا بارلىق كەزەڭدەردى جان-جاقتى تالقىلادى»، دەدى كوميسسيا مۇشەسى ءادىل احمەتوۆ.

جۇماتاي اليەۆ «مەملەكەت جانە ءدىن» تاقىرىبىندا شىعارما جازعان. كوميسسيا قورىتىندىسىنا سەنسەك، اليەۆ ءوز شىعارماسىندا تاقىرىپتى مۇلدە اشا الماعان ەكەن. وعان قوسا، ەكىنشى كەزەڭدە اۋەزوۆتىڭ «اباي جولى» رومانىنان ءۇزىندى وقىعان. اليەۆ ونى دا قاتىرماپتى. ءۇشىنشى كەزەڭدە «ىرىس الدى - ىنتىماق» تاقىرىبىندا بايانداما جاساعان. بايانداماسىى دا ءۇستىرت جاسالعان. ال ءبىرىنشى كەزەڭدە جازعان شىعارماسىنداعى 13 سويلەمنەن 19 قاتە جىبەرگەن. وسك جانىنان قۇرىلعان لينگۆيستيكالىق كوميسسياسى قورىتىندىسى وسىعان سايادى.

سونىمەن پرەزيدەنتتىككە ۇمىتكەر رەتىندە وسك-عا قۇجات تاپسىرعان بارلىق ۇمىتكەر مەملەكەتتىك ءتىل ەمتيحانىن تاپسىرۋعا مىندەتتى. وسىعان دەيىن قاسىم-جومارت توقاەۆ باستاعان بارلىق ۇمىتكەرلەر بۇل ەمتيحاندى تاپسىرعان. سالىستىرۋ ءۇشىن وزگەلەردىڭ ەمتيحانىنا كوز جۇگىرتكەندى ءجون كوردىك. كىم-قالاي جازدى؟

مەملەكەتتىك ءتىل ەمتيحانى ءۇش كەزەڭنەن تۇرادى: تاقىرىپ بويىنشا جازباشا تاپسىرما جازۋ، ءماتىن وقۋ جانە لينگۆيستيكالىق كوميسسيا بەرگەن تاقىرىپقا سايكەس كوپشىلىك الدىندا كەمىندە 15 مينۋت سويلەۋ.

قاسىم-جومارت توقاەۆ

ول مەملەكەتتىك ءتىل ەمتيحانىنان 23 ءساۋىر كۇنى ءوتتى.

ءبىرىنشى كەزەڭدە – «اباي قۇنانبايۇلىنىڭ پوەزياسى مەن قارا سوزدەرى» تاقىرىبىندا ەسسە جازدى.

ەكىنشى كەزەڭدە – شەرحان مۇرتازانىڭ «مىڭبۇلاق» كىتابىنان ءۇزىندى وقىدى.

ءۇشىنشى كەزەڭدە – «قازىرگى قازاقستاننىڭ گەوساياساتى» تاقىرىبىندا ءوز ويىن 15 مينۋتتا اۋىزشا ايتىپ بەردى.

لينگۆيستيكالىق كوميسسيا توقاەۆتىڭ قازاق ءتىلىن جەتىك مەڭگەرگەنىن، جازباشى جۇمىسىنىڭ مازمۇنى تەرەڭ اشىلعانىن، ءۇزىندىنى ەموتسيونالدى تۇردە، مانەرلەپ وقىپ شىققانىن، ءوز ويىن قازاقشا ەركىن جەتكىزگەنىن ايتىپ، جوعارى باعالادى.

قورىتىندىنى حابارلاعان – مىرزاتاي جولداسبەكوۆ

سادىبەك تۇگەل

ول مەملەكەتتىك ءتىل ەمتيحانىنان 24 ءساۋىر كۇنى ءوتتى.

ءبىرىنشى كەزەڭدە – «تاۋەلسىز مەملەكەتتەر دوستاستىعى – تاريحى مەن بۇگىنى» تاقىرىبىندا ەسسە جازدى.

ەكىنشى كەزەڭدە – ءابىش كەكىلباەۆتىڭ «دالا باللادالارى» جيناعىنان ءۇزىندى وقىدى.

ءۇشىنشى كەزەڭدە – «بابالار ءسوزى – دانالىق كوزى» تاقىرىبىندا ءوز ويىن 15 مينۋتتا ايتىپ بەردى.

لينگۆيستيكالىق كوميسسيا تۇگەلدىڭ جازباشا جۇمىستا ازداعان پۋنكتۋاتسيالىق قاتەلەر جىبەرگەنىن، وقۋ كەزىندە ۇمىتكەر مەملەكەتتىك ءتىلدى ەركىن مەڭگەرگەنىن،  ءۇشىنشى تاپسىرما بويىنشا ءسوز سويلەۋ مانەرى جوعارى ەكەنىن اتاپ ءوتتى.

ەمتيحان قورىتىندىسى بويىنشا سادىبەك تۇگەل مەملەكەتتىك ءتىلدى ەركىن مەڭگەرگەن دەگەن قورىتىندى شىعاردى.

قورىتىندىنى حابارلاعان – عاريفوللا ەسىم

دانيا ەسپاەۆا

ول مەملەكەتتىك ءتىل ەمتيحانىن 26 ءساۋىر كۇنى تاپسىردى.

ءبىرىنشى كەزەڭدە – «ۇلى دالانىڭ جەتى قىرى» تاقىرىبىندا ەسسە جازدى.

ەكىنشى كەزەڭدە – مۇقاعالي ماقاتاەۆتىڭ «امانات» ولەڭدەر جيناعىنان ءۇزىندى وقىدى.

ءۇشىنشى كەزەڭدە – «قوعام جانە دەموكراتيا» تاقىرىبىندا ءوز ويىن 15 مينۋتتا ايتىپ بەردى.

لينگۆيستيكالىق كوميسسيا قورىتىندىسى بويىنشا دانيا ەسپاەۆا مەملەكەتتىك ءتىلدى ەركىن مەڭگەرگەنى تۋرالى شەشىم شىعارىلدى. كوميسسيا مۇشەلەرى ونىڭ ءۇش تاپسىرماسىن دا جوعارى باعالادى.

قورىتىندىنى حابارلاعان – سەيىت قاسقاباسوۆ

امانگەلدى تاسپيحوۆ

ول مەملەكەتتىك ءتىل ەمتيحانىن 26 ءساۋىر كۇنى تاپسىردى.

ءبىرىنشى كەزەڭدە – «مپەنىڭ ەلىم» تاقىرىبىندا ەسسە جازدى.

ەكىنشى كەزەڭدە – قادىر مىرزا ءالىنىڭ «تاڭداۋلى شىعارمالارى» جيناعىنان ءۇزىندى وقىدى.

ءۇشىنشى كەزەڭدە – «ءتىل تاعدىرى – ەل تاعدىرى» تاقىرىبى بويىنشا 15 مينۋتتىق سوزتالقى جاسادى.

لينگۆيستيكالىق كوميسسيا تاسپيحوۆتىڭ جۇمىسىن جاقسى باعالادى. ءسويتىپ ءتىلدى ەركىن مەڭگەرگەن دەگەن قورىتىندى جاسادى.

قورىتىندىنى – ءادىل احمەتوۆ بايانداپ بەردى.

تولەۋتاي راقىمبەكوۆ

ول مەملەكەتتىك ءتىل ەمتيحانىن 27 ءساۋىر كۇنى تاپسىردى.

ءبىرىنشى كەزەڭدە – «ءبىزدىڭ كۇشىمىز - بىرلىكتە» تاقىرىبىندا ەسسە جازدى.

ەكىنشى كەزەڭدە – اۋەزوۆتىڭ «اباي جولى» رومانىنان ءۇزىندى وقىدى.

ءۇشىنشى كەزەڭدە – «ەلوردا – تاۋەلسىزدىك تۇعىرى» تاقىرىبى بويىنشا ءوز ويىن 15 مينۋتقا سىيدىرىپ ايتىپ بەردى.

كوميسسيا تولەۋتاي راقىمبەكوۆ قازاق ءتىلىن ەركىن مەڭگەرگەن دەگەن قورىتىندى جاسادى.

قورىتىندىنى ەردەن قاجىبەك وقىپ بەردى.

جامبىل احمەتبەكوۆ

ول مەملەكەتتىك ءتىل ەمتيحانىن 27 ءساۋىر كۇنى تاپسىردى.

ءبىرىنشى كەزەڭدە – «رۋحاني جاڭعىرۋ» تاقىرىبىندا ەسسە جازدى.

ەكىنشى كەزەڭدە – ءىلياس ەسەنبەرليننىڭ «قاھار» رومانىنان ءۇزىندى وقىدى.

ءۇشىنشى كەزەڭدە – «ەل بىرلىگى – ەلدىكتىڭ ارقاۋى» تاقىرىبىندا سوزتالقى جاسادى.

كوميسسيا ەمتيحانىنڭ بارلىق كەزەڭدەرى بويىنشا ۇمىتكەر مەملەكەتتىك ءتىلدى ەركىن مەڭگەرگەن دەگەن قورىتىندىعا كەلدى.

قورىتىندىنى عاريفوللا ەسىم بايانداپ بەردى.

ءامىرجان قوسانوۆ

ول مەملەكەتتىك ءتىل ەمتيحانىن 29 ءساۋىر كۇنى تاپسىردى.

ءبىرىنشى كەزەڭدە -  «تاۋەلسىز مەملەكەتتەر دوستاستىعى – تاريحى مەن بۇگىنى» تاقىرىبىندا ەسسە جازدى.

ەكىنشى كەزەڭدە – قادىر مىرزا ءالىنىڭ ولەڭدەرىن وقىدى.

ءۇشىنشى كەزەڭدە – «ونەر ءبىلىم بار جۇرتتار...» تاقىرىبىندا 15 مينۋت سويلەدى.

كوميسسيا  ۇمىتكەر قوسانوۆتىڭ بارلىق تاپسىرمانى وتە جوعارى دەڭگەيدە ورىنداعانىن اتاپ ءوتتى. ءسويتىپ ونىڭ مەملەكەتتىك ءتىلدى مەڭگەرۋ دەڭگەيىن جوعارى باعالادى.

قورىتىندى باياندامانى مىرزاتاي جولداسبەكوۆ جاسادى.

ناتيجەسىندە بۇگىن وسك-عا قۇجات تاپسىرعان سەگىزىنشى ۇمىتكەر مەملەكەتتىك ءتىل ەمتيحانىنان وتپەي قالدى. ال وسك-عا قۇجات تاپسىرۋ 28 ءساۋىر كۇنى كەشكى ساعات 18:00-دە اياقتالعان ەدى. ەندى ورتالىق سايلاۋ كوميسسياسى 11 مامىرعا دەيىن وسى قالعان جەتى ۇمىتكەردى تىركەيدى. ونان كەيىن سايلاۋالدى ۇگىت-ناسيحات جۇماستارى باستالادى. ال سايلاۋ 9 ماۋسىم كۇنى وتەدى.

«ادىرنا» ۇلتتىق پورتالى

 

 

پىكىرلەر
رەداكتسيا تاڭداۋى
Серіктестер/Партнеры
Студия IMA - создание сайтов Доставка цветов Астана - Lova Buket