جەر داۋى. شىمكەتتە شەنەۋنىككە سەنىپ جەرىنەن ايىرىلعان ازامات جولدى جاۋىپ تاستادى

كتك تەلەارناسىنىڭ حابارلاۋىنشا, كاسىپكەر شەنەۋنىكتەردىڭ سوزىنە سەنىپ، اقىرىندا وپىق جەگەن. اتاپ ايتقاندا، شەنەۋنىكتەر اۋىل شارۋاشىلىق ماقساتتاعى جەردىڭ قۇجاتتارىن ءۇش ايدا رەتتەپ، ساتىپ الامىز دەپ ايتقان. الايدا كاسىپكەرگە ەشقانداي اقشا بەرمەگەن. ەسەسىنە جەرگە تاس جول توسەلگەن. ەندى اقشاسىن داۋلاعان كاسىپكەر كوشەنىڭ ەكى باسىنا تاس توگىپ، قوزعالىستى جاۋىپ تاستادى. مال اسىراپ، ءتورت تۇلىگىنە وسى جەردەن جەم-ءشوبىن دايىنداعان كاسىپكەرگە تيەسىلى تەلىم ءتورت جىل بۇرىن اكىمدىكتىڭ بالانسىنا وتكەنى بەلگىلى بولدى. "استانادان پرەمەر-مينيستر كەلە جاتىر، تەزىرەك جول توسەۋىمىز كەرەك" دەگەن شەنەۋنىكتەر قۇجاتتارىن ءۇش ايدا راسىمدەۋگە ۋادە بەرەدى. بىراق ودان بەرى تالاي جىل وتسە دە، بىردە-ءبىر تەڭگە تولەمەگەن. سوندىقتان كاسىپكەر ۇزىندىعى 750 مەترلىك ۋچاسكەنىڭ ۇستىنە تۇسكەن اسفالت جولعا تاس توگىپ، قوزعالىستى جاۋىپ تاستادى. جول جابىلىسىمەن، كولىك كەپتەلىسى بولدى. بۇعان قاتىستى جولدى جاپقان كاسىپكەر باقىتجان وشاقباەۆ:

ء"سىزدىڭ جەرىڭىزدەن وسى جولدىڭ بويىنا ءبىز اسفالت جول سالايىق، رۇقسات بەرىڭىزدەر ءبىز بارلىق زاڭدى ءتيىستى قۇجاتتارىڭىزدى راسىمدەپ بەرەمىز، وتەماقى تولەنەدى، ايىرىپ الۋ بولىپ سانالادى دەپ ۋادەسىن بەردى. ءبىز ول اۋدان اكىمدىگىنىڭ سوزىنە سەنگەندىكتەن، رۇقساتىمىزدى بەردىك. جەر ءبىزدىڭ وزىمىزدىكى، ءوزىمىزدىڭ قۇقىمىز بار، اسفالتتىڭ ءبارىن قوپارىپ تاستايمىز، ءسويتىپ وزىمىزگە، كاسىبىمىزگە، ماقساتىمىزعا پايدالانامىز، بۇل امالدىڭ جوقتىعىنان", - دەپ پىكىر بىلدىرەدى.

"قازىر ەسەپتەۋ پروتسەسى ءجۇرىپ جاتىر. كولىك باسقارماسى قاعازدارىن راسىمدەيدى، قۇجاتتارى قالاي بىتەدى، وسى اپتادا باعالاۋ جۇمىستارىن جۇرگىزىپ، زاڭعا سايكەس، اقىسىن تولەپ بەرەدى", - دەدى ءال-فارابي اۋدانىنىڭ اكىمى راشيد مىڭباەۆ.