ىشكى ىستەر مينيسترلىگىنىڭ وكىلدەرى قازاقستان قالالارىنداعى ميتينگىلەرگە قاتىستى پىكىر ءبىلدىردى. بۇل تۋرالى ۆەدومستۆونىڭ ءباسپاسوز قىزمەتى حابارلادى.
"1 مامىردا نۇر-سۇلتان، الماتى، سەمەي، قاراعاندى جانە اقتوبە قالالارىندا باس پروكۋراتۋرانىڭ رەسمي حابارلاماسىنا قاراماستان، سانكتسيالانباعان ميتينگىلەر مەن تۇرعىندار جينالدى. اكتسياعا قاتىسۋشىلارعا وزدەرىنىڭ ۇستانىمدارى مەن الەۋمەتتىك جانە باسقا دا پروبلەمالىق ماسەلەلەر بويىنشا پىكىرلەرىن ەركىن جانە اشىق بىلدىرۋگە مۇمكىندىك بەرىلدى", - دەلىنگەن ءىىم حابارلاماسىندا.
"الايدا نۇر-سۇلتان جانە الماتى قالالارىندا جينالعانداردىڭ ىشىنەن بىرقاتار ادام وزدەرىن اگرەسسيالىق تۇردە ۇستاپ، تىيىم سالىنعان "دۆك" ەكسترەميستىك ۇيىمىنىڭ ۇراندارىن ايقايلاپ ايتىپ، قوعامدىق ءتارتىپتى بۇزدى. وسىعان بايلانىستى اكىمدىكتەر مەن پروكۋراتۋرا وكىلدەرى بەيبىت ميتينگىلەر، جينالىستار مەن شەرۋلەر وتكىزۋ ءتارتىبى تۋرالى زاڭنامانىڭ ەرەجەلەرىن ءتۇسىندىردى. جەكەلەگەن ازاماتتار زاڭسىز ارەكەتتەردى توقتاتۋ تۋرالى تالاپتارعا باعىنبادى. سودان كەيىن پوليتسيا كۇشىمەن قوعامدىق ءتارتىپتى قالپىنا كەلتىرۋگە جانە ءتارتىپ بۇزۋشىلاردى ۇستاۋ شارالارى قابىلداندى".
ءىىم مالىمەتىنشە، ەلوردادا جانە الماتىدا پوليتسيا بولىمدەرىنە 80 ادام جەتكىزىلدى.
"ولاردىڭ ارەكەتتەرىنە زاڭدا بەلگىلەنگەن تارتىپپەن قۇقىقتىق باعا بەرىلەدى. ىشكى ىستەر مينيسترلىگى ازاماتتارعا ارانداتۋشىلىققا بەرىلمەۋگە جانە قازاقستان رەسپۋبليكاسىنىڭ زاڭناما تالاپتارىن ساقتاۋعا شاقىرادى", - دەلىنگەن حابارلامادا.
