سارىاعاشتاعى ءبۇلدىرشىن ءولىمى. 5 جاسار قىزدى قاتىگەزدىكپەن ولتىرگەن قاسكويگە ۇكىم شىقتى

ۇكىم بويىنشا، ەر ادام ءومىر بويىنا باس بوستاندىعىنان ايىرىلعان. ودان بولەك، سوت وعان حيميالىق كاستراتسيا قولدانۋدى قاۋلى ەتتى. مارقۇمنىڭ اتا-اناسى ۇكىمگە كەلىستى. بىراق ولار وسى جىلدىڭ مامىر ايىندا ايىپتالۋشىعا تىم جەڭىل ۇكىم شىعارعان سۋديا مەن پروكۋروردى جاۋاپقا تارتۋدى سۇرادى. سوتتالۋشى سايدوليم گايبنازاروۆ 2006 جىلى كىسى ولتىرگەنى ءۇشىن 10 جىلعا سوتتالىپ، بيىل مامىردا اۋىلداسىنا بالتامەن شابۋىلداعانى ءۇشىن تاعى دا ءىستى بولعان. سوت ونىڭ جابىرلەنۋشىمەن تاتۋلاسقانىن، 10 جىلدىق جازاسىن تولىق وتەپ كەلگەنىن ەسكەرىپ، تەك 3 جىلعا عانا تۇرمەگە كەسكەن. ال كەيىننەن پروباتسيالىق باقىلاۋعا الىپ، بوساتىپ جىبەرگەن. ەسكە سالساق، وقيعا تۇركىستان وبلىسى سارىاعاش اۋدانىندا بولعان ەدى. سارىاعاش اۋدانى، جىبەك جولى اۋىلىندا بەس جاسار قىزدىڭ جوعالعانى 13 شىلدەدە بەلگىلى بولدى. كەيىن بالانىڭ دەنەسى كورشىسىنىڭ ءۇيىنىڭ شاتىرىنان تابىلدى. كۇدىكتى ۇستالعان سوڭ اۋىل تۇرعىندارى نارازىلىق تانىتىپ، ونى حالىققا بەرۋدى تالاپ ەتكەن. كىسى ءولتىرۋ فاكتىسى بويىنشا قىلمىستىق كودەكستىڭ 99-بابىنىڭ 3-بولىگى (كامەلەتكە تولماعان ادامدى ءولتىرۋ)  بويىنشا قىلمىستىق ءىس قوزعالدى. كۇدىكتى بۇعان دەيىن دە اۋىر قىلمىستارى ءۇشىن سوتتالعان. سونداي-اق، توقاەۆ بۇعان دەيىن اۋىر قىلمىس جاساعانىنا قاراماستان كۇدىكتىگە جەڭىل جازا تاعايىنداعان سۋديانى تەكسەرۋدى تاپسىرىپ، ءىستى نازارعا العان ەدى.