ۆلاديمير زەلەنسكي ەلدىڭ قورعانىس مينيسترلىگىنىڭ جاڭا باسشىسى قىزمەتىنە رۋستام ۋمەروۆتىڭ كانديداتۋراسىن ۇسىندى، دەپ حابارلايدى “ادىرنا”.
ۋكراينانىڭ قورعانىس ءمينيسترى الەكسەي رەزنيكوۆ وتستاۆكاعا كەتۋ تۋرالى ءوتىنىش بەردى. رەزنيكوۆ بۇل تۋرالى X پلاتفورماسىندا مالىمدەدى.
«مەن ۋكراينا جوعارعى راداسىنىڭ سپيكەرى رۋسلان ستەفانچۋكقا وتستاۆكاعا كەتۋ تۋرالى ءوتىنىش بەردىم. سوڭعى 22 ايدا ۋكراينانىڭ قازىرگى تاريحىنداعى ەڭ قيىن كەزەڭدە ۋكراين حالقى مەن ەل ارمياسىنا قىزمەت ەتۋ مەن ءۇشىن قۇرمەت بولدى»، - دەدى رەزنيكوۆ ءوز مالىمدەمەسىندە.
«رەسەي ۋاقىتشا باسىپ العان اۋماقتاردىڭ 50 پايىزدان استامى ازات ەتىلدى. كۇن سايىن ءبىزدىڭ قورعاۋشىلار العا جىلجۋدا»، - دەدى رەزنيكوۆ.
ۋكراينانىڭ لوندونداعى ەلشىسى بولۋى مۇمكىن دەگەن بولجام بار رەزنيكوۆ نەگىزگى وداقتاستارىمەن ۇزاق مەرزىمدى سەرىكتەستىك ورناتۋدى جانە «شىنايى قاۋىپسىزدىك كەپىلدىگىن» كيەۆتىڭ باستى باسىمدىلىقتارىنىڭ ءبىرى دەپ سانايتىنىن ايتتى.
ۋكراينا پرەزيدەنتى ۆلاديمير زەلەنسكي جەكسەنبى كۇنى ەلدىڭ قورعانىس ءمينيسترىن اۋىستىرۋ تۋرالى شەشىم قابىلداعانىن مالىمدەگەن بولاتىن. زەلەنسكي ەلگە ارناعان بەينە ۇندەۋىندە: «مينيسترلىككە اسكەرمەن دە، جالپى قوعاممەن دە قارىم-قاتىناستىڭ جاڭا تاسىلدەرى مەن باسقا دا فورماتتارى قاجەت دەپ ەسەپتەيمىن»،-دەدى.
رەزنيكوۆتىڭ وتستاۆكاعا كەتۋى سوعىس كەزىندەگى ۋكراينا قورعانىس ۆەدومستۆوسىنداعى ەڭ ۇلكەن كادرلىق اۋىس-ءتۇيىس بولدى.
زەلەنسكي ۋكراينانىڭ مەملەكەتتىك مۇلىك قورىنىڭ باسشىسى رۇستەم ۋمەروۆتى ەلدىڭ قورعانىس ىستەرىن باسقارۋعا شاقىردى. ۋمەروۆتىڭ كانديداتۋراسىن جوعارعى رادا ماقۇلداۋى قاجەت.
ۇقساس جاڭالىقتار
