قازاقستانداعى ءدىني احۋالعا، ءدىني ەركىندىك پەن ءدىني ساياساتقا قاتىستى ءوز ويىن اشىق ايتىپ، يۋتۋب ارنالارىنىڭ بىرىنە سۇحبات بەرگەن قوعام بەلسەندىسى تورتۋىل شوقانعا قارسى جاسالعان قىسىمدى سيپاتتاعان بەلسەندى تۇراربەك قۇسايىنۇلى توسىن مالىمدەمە جاسادى. ول ءوزىنىڭ ۇرپاعىنا وسيەت جازىپ قالدىرىپ، ونى جالپاق جۇرتپەن ءبولىستى، دەپ حابارلايدى "ادىرنا" ۇلتتىق پورتالى.
وسيەت-حات يەسى قازاقستانداعى ءدىني الابوتەندىكتى سيپاتتاپ، مىنانداي ماتىنمەن ءبولىستى:
- قۇرمەتتى قازاقي تانىمداعى زايىرلى وتانداستار!
تورتۋىل شوقان اعامىزعا يمام-مولدالار قاتتى شۇيلىگىپ، ابدەن قارعاپ-سىلەپ جاتىر ەكەن. بۇعان سەبەپ نۇرەكەڭنىڭ جۋرناليست نۇرسەيىت جىلقىشىبايعا بەرگەن اششى دا بولسا، اقيقاتقا تولى سۇحباتى دەر ەدىم.
سوعان بايلانىستى مەن كىشى ءجۇز اداي رۋى ، ونىڭ ىشىندە توبىشتىڭ تابىنايى بوپ تابىلاتىن تۇراربەك قۇسايىنۇلى وسى جارىق دۇنيەدە ءدام-تۇزىم تاۋسىلىپ، الدا-جالدا،ياعني بولاشاقتا اقتىق ساپارعا اتتانسام، مەنى اراب-پارسى يدەولوگياسى جانە مادەنيەت-فولكلورىنا نەگىزدەلگەن يسلام ءدىنىنىڭ اراب تىلىندە وقىلاتىن ءدىني راسىمىمەن جەرلەۋگە ءۇزىلدى-كەسىلدى قارسى ەكەنىمدى ءبىلدىرىپ، ءوز ۇستانىمىمدى حالىق الدىندا اشىق مالىمدەگىم كەلەدى.
اتالمىش وسيەت-حات ءوز قولىممەن جازىلدى جانە ەڭ جاقىن تۋىستارىما تابىستالدى.
قۇرمەتپەن وسيەت-حات يەسى: تۇراربەك قۇسايىنۇلى
02.09.2023, - دەپ جازدى قوعام بەلسەندىسى.
ورايى كەلگەندە ايتا كەتەيىك، قوعام بەلسەندىسى تورتۋىل شوقان قازاقستانداعى قايشىلىققا تولى ءدىني الاۋىزدىق پەن ءدىني احۋالدى تالداپ، ساراپتاپ، جۋرناليست نۇرسەيىت جىلقىشىبايعا سۇحبات بەرەدى. بەلسەندى تۇراربەك قۇسايىنۇلى وسىنداي مالىمدەمە جاساۋ ارقىلى سۇحباتتاعى كوزقاراستى قولدايتىنىن بىلدىرمەك بولعان.
"ادىرنا" ۇلتتىق پورتالى
