الماتى مەن پۋسان تۋىستاس قالالار اراسىنداعى ىنتىماقتاستىق تۋرالى كەلىسىمنىڭ 1 جىلدىعىنا وراي 24 تامىزدا جامبىل اتىنداعى قازاق مەملەكەتتىك فيلارمونياسىندا «سازگەن سازى» فولكلورلىق-ەتنوگرافيالىق ءانسامبلى مەن پۋسان قالالىق ءداستۇرلى كارىس مۋزىكاسى وركەسترىنىڭ مەرەكەلىك كونتسەرتى ءوتتى.
ساپار اياسىندا وڭتۇستىك كورەيادان كەلگەن قوناقتار «مەدەۋ» بيىك تاۋلى سپورت كەشەنى مەن الماتىنىڭ ءىنجۋ-مارجانى – «شىمبۇلاق» تاۋ شاڭعىسى كۋرورتىنا باردى. دەلەگاتسيا مۇشەلەرى قالانىڭ تاۋلى جەرلەرگە جاقىن ورنالاسۋىن، كۋرورتتاردىڭ، كوركەم شاتقالدار مەن كولدەردىڭ بولۋىن اتاپ ءوتىپ، سپورت نىساندارىنا جوعارى باعا بەردى.
الماتىنىڭ تۋريستىك الەۋەتىن ارتتىرۋ جانە دامىتۋ قالالىق تۋريزم باسقارماسىنىڭ باسىم مىندەتىنىڭ ءبىرى. شىنايى ارحيتەكتۋراسى مەن باي مادەني ءومىرىن ەسكەرە وتىرىپ، مەگاپوليستە مادەني-تانىمدىق (مۋزەيلەرگە، تەاترلارعا، مادەني ءىس-شارالارعا بارۋ), MICE تۋريزم (حالىقارالىق فورۋمدار، كونفەرەنتسيالار مەن كونگرەستەر), تاۋ (شىڭعا شىعۋ، الپينيستەر، سنوۋبوردشىلار، شاڭعى اۋەسقويلارى قاۋىمداستىعىنىڭ كەزدەسۋلەرى ت.ب.), سونىمەن قاتار، گاسترونوميالىق سىندى ءتۋريزمنىڭ سان ءتۇرى قاتار دامىپ وتىر.
