قازا تاپقاندار التىن كەنىشىنە زاڭسىز تۇسكەندەر ەكەنى بەلگىلى بولدى، بىرەۋى امان قالدى
اقمولا وبلىسىندا "قازاقالتىن" تاۋ-كەن كومبيناتىنا تيەسىلى بەستوبەدەگى كەنىشتە تاۋ جىنىستارى وپىرىلىپ، سالدارىنان ەكى ادام قازا تاۋىپ، بىرەۋى اۋرۋحاناعا جەتكىزىلدى، دەپ حابارلايدى Sputnik قازاقستان تىلشىسى.
وقيعا سەنبى، 27 ساۋىردە تاڭعى ساعات 04.00-تە بولعان. وڭىرلىك توتەنشە جاعدايلار دەپارتامەنتىنىڭ ءباسپاسوز قىزمەتى حابارلاعانداي، كەن تاستارى وپىرىلعان كەزدە شاحتانىڭ ىشىندە بولعان ءۇش ادام كەنىشكە زاڭسىز تۇسكەندەر بولىپ شىقتى.
قازا تاپقانداردىڭ ءبىرىنىڭ كىم ەكەنىن انىقتالدى، ول 1976 جىلى تۋعان ك. س. ەسىمدى ازامات.
"كەنىشكە زاڭسىز تۇسكەندەردىڭ قاي ەلدى مەكەننىڭ تۇرعىندارى ەكەنى ازىرگە بەلگىسىز. قۇجاتتارى جوق. قازىر ەكىنشى ادامنىڭ كىم ەكەنىن انىقتاپ جاتىرمىز", - دەدى وقيعا ورنىندا بولعان ستەپنوگورسك توتەنشە جاعدايلار باسقارماسىنىڭ ينسپەكتورى سۇڭعات ابراەۆ.
قازا بولعاندار مەن امان قالعان تۇرعىندى ءۇيىندى استىنان "قازاقالتىن" كومبيناتىنىڭ جانىنداعى تاۋ-كەن قۇتقارۋ جاساعىنىڭ ماماندارى مەن توتەنشە جاعدايلار باسقارماسىنىڭ قۇتقارۋشىلارى الىپ شىقتى.
