Qaza tapqandar altyn kenishine zańsyz túskender ekeni belgili boldy, bireýi aman qaldy
Aqmola oblysynda "Qazaqaltyn" taý-ken kombınatyna tıesili Bestóbedegi kenishte taý jynystary opyrylyp, saldarynan eki adam qaza taýyp, bireýi aýrýhanaǵa jetkizildi, dep habarlaıdy Sputnik Qazaqstan tilshisi.
Oqıǵa senbi, 27 sáýirde tańǵy saǵat 04.00-te bolǵan. Óńirlik tótenshe jaǵdaılar departamentiniń baspasóz qyzmeti habarlaǵandaı, ken tastary opyrylǵan kezde shahtanyń ishinde bolǵan úsh adam kenishke zańsyz túskender bolyp shyqty.
Qaza tapqandardyń biriniń kim ekenin anyqtaldy, ol 1976 jyly týǵan K. S. esimdi azamat.
"Kenishke zańsyz túskenderdiń qaı eldi mekenniń turǵyndary ekeni ázirge belgisiz. Qujattary joq. Qazir ekinshi adamnyń kim ekenin anyqtap jatyrmyz", - dedi oqıǵa ornynda bolǵan Stepnogorsk tótenshe jaǵdaılar basqarmasynyń ınspektory Suńǵat Abraev.
Qaza bolǵandar men aman qalǵan turǵyndy úıindi astynan "Qazaqaltyn" kombınatynyń janyndaǵy taý-ken qutqarý jasaǵynyń mamandary men tótenshe jaǵdaılar basqarmasynyń qutqarýshylary alyp shyqty.