استانادا بانك بولىمشەسىن كەپىلگە العان ازاماتقا قاتىستى سوت باستالدى

سوت ءۇردىسىن قىلمىستىق ىستەر جونىندەگى اۋدانارالىق سوتىنىڭ سۋدياسى ءابينۇر قاراباەۆ جۇرگىزەدى. ايىپتاۋ ءمانىن استانا قالاسى پروكۋراتۋراسىنىڭ اعا پروكۋرورى اقشۋراەۆا تۇجىرىمدادى. تەرگەۋ دەرەكتەرى بويىنشا، سوتتالۋشى مۇرادوۆ ءدارى قولدانۋ ارقىلى ءوز-وزىنە قول جۇمساۋعا شەشىم قابىلداعان. ەسىرتكىدەن قاجەتتى ناتيجە الماعان ول بانكتى باسىپ الۋ جوسپارىن ويلاپ تاپقان. پروكۋراتۋرانىڭ حابارلاۋىنشا، مۋرادوۆ مۇقتاج ادامدارعا اقشا تالاپ ەتپەك بولعان، سودان كەيىن ونى قاماۋعا الۋ كەزىندە ءتارتىپ ساقشىلارى اتىپ ءولتىرۋدى جوسپارلاعان. مۋرادوۆ جارىلعىش قۇرىلعىنى قولدان جاساعان (وتتىق پەن تەمەكى شەگەتىن قۇرالدان). سونىمەن قاتار سىيلىق دۇكەنىنەن جەڭىل قارۋ ساتىپ العان. اتالمىش قۇرالدارمەن بانك بولىمشەسىنە شابۋىل جاساپ، قىزمەتكەرلەردى كەپىلگە العان.

- وسىلايشا، مۇرادوۆ قازاقستان رەسپۋبليكاسى قىلمىستىق كودەكسىنىڭ 261-بابىنىڭ 2-بولىگىنىڭ 4, 8, 9-تارماقتارىندا (كەپىلگە الۋ) كوزدەلگەن ارەكەتتەردى جاساعان", - دەپ اتاپ ءوتتى پروكۋرور اقشۋراەۆا.

سوتتالۋشى ءوز كىناسىن مويىندادى، بىراق كەپىلگە الۋ كەزىندە ەسىرتكى قولدانباعانىن ايتتى. سوت جابىرلەنۋشىلەر مەن كۋاگەرلەردەن جاۋاپ الۋعا كىرىستى. 18 ماۋسىمدا Kaspi Bank ەلوردالىق بولىمشەلەرىنىڭ بىرىندە قارۋلى ادام ادامداردى كەپىلگە الدى. بەلگىلى بولعانداي، باسقىنشى جامبىل وبلىسىندا دۇنيەگە كەلگەن 1993 جىلعى ءاليحان مۇرادوۆ اتتى ەر ادام ول استانانىڭ قاق ورتاسىندا ورنالاسقان كاسپي بانكىنىڭ فيليالىنا باسىپ كىرگەن. 7 ادامدى قاماۋعا الىپ، بانكتەگى بارلىق قاراجاتتى كەدەي-كەپشىك پەن مۇگەدەكتەرگە تاراتىپ بەرۋدى تالاپ ەتكەن. اتالعان فاكتى بويىنشا قىلمىستىق كودەكستىڭ 261-بابى 2-بولىگىنىڭ 4 جانە 8-تارماقتارى بويىنشا (كەپىلگە الۋ) سوتقا دەيىنگى تەرگەۋ باستالدى. كەيبىر مالىمەتتەرگە قاراعاندا، 2013 جىلدان بەرى باسقىنشى ناركولوگيالىق ديسپانسەردە ەسەپتە تۇرادى. قىلمىستىق ىستەر بويىنشا ەكى رەت سوتتالعان. ەسكە سالايىق، بۇعان دەيىن استانادا قارۋلانعان ەر ادام بانكتەردىڭ بىرىندە كەلۋشىلەردى كەپىلدىككە العانىن حابارلادىق. ول 7 ادامدى كەپىلگە الىپ، تالابى ورىندالماسا، ءۇش ساعاتتان كەيىن ءبىرىنشىسىن ولتىرەتىنىن ەسكەرتكەن.

"ادىرنا" ۇلتتىق پورتالى