فوتو: urfu.ru
قازاقستاننىڭ رەسەيدەگى ەلشىسى داۋرەن اباەۆ ەكاتەرينبۋرگتە وتكەن حالىقارالىق جاستار فەستيۆالىنە قاتىسىپ، قازاقستاننان بارعان دەلەگاتسيا وكىلدەرى مەن فەستيۆال قاتىسۋشىلارى الدىندا ءسوز سويلەدى، دەپ حابارلايدى "ادىرنا".
فەستيۆالدە قازاقستان اتىنان ەلدىڭ بارلىق وڭىرىنەن جينالعان شامامەن 100 ادام قاتىستى. جيىن بارىسىندا داۋرەن اباەۆ جاستارعا ءوزىنىڭ بىرنەشە كەڭەسىن ايتتى.
ەلشى جاستارعا ەڭ الدىمەن ادامگەرشىلىك قاسيەتكە ءمان بەرۋگە شاقىردى. ول بۇل ويىن ادەتتەگىدەن وزگەشە سوزدەرمەن جەتكىزدى.
«جاستارعا ايتارىم – بىرنەشە نارسە عانا. وڭباعان بولماڭدار. دۇرىس اۋدارىلادى دەپ ۇمىتتەنەمىن. بۇل – ءبىرىنشى. ەگەر “جاقسى ادام بولىڭدار” دەسەم، مۇنى، بالكىم، ەستە ساقتاماس ەدىڭىزدەر. بۇل وتە ماڭىزدى داعدى، ماڭىزدى قاسيەت – وڭباعان بولماۋ»، – دەدى اباەۆ.
سونىمەن قاتار ول ستۋدەنتتەرگە ءوز سالاسىنىڭ كاسىبي مامانى بولۋعا جانە الەۋمەتتىك بايلانىستارىن كەڭەيتۋگە كەڭەس بەردى.
اباەۆ ءوزىنىڭ ستۋدەنتتىك جىلدارىن مىسال رەتىندە كەلتىردى. ونىڭ ايتۋىنشا، ول كەزدە ستۋدەنتتىك كاسىپوداق كوميتەتىن باسقارعان، فۋتبول ويناعان جانە كۆن-گە قاتىسقان. وسى بەلسەندىلىكتىڭ ارقاسىندا تانىستار ورتاسىن ەداۋىر كەڭەيتكەن.
ەلشىنىڭ سوزىنشە، وقۋ اياقتالعاننان كەيىن جاڭا ادامدارمەن تانىسۋعا جانە بايلانىس ورناتۋعا ۋاقىت ازايادى. سوندىقتان جاستارعا كاسىبي ءبىلىم الۋمەن قاتار، ستۋدەنتتىك كەزدىڭ وزىندە الەۋمەتتىك ورتا قالىپتاستىرۋ ماڭىزدى.
