سەمەيدە قاڭتار وقيعاسى كەزىندە جاندوس جوتاباەۆتى ازاپتاپ ءولتىردى دەپ ايىپتالعان پوليتسەيلەرگە قاتىستى ۇكىم شىقتى، دەپ حابارلايدى “ادىرنا” ۇلتتىق پورتالى.
قالالىق سوت ەكى پوليتسيا قىزمەتكەرىن "قاتىگەز، ادامگەرشىلىككە جاتپايتىن نەمەسە قادىر-قاسيەتتى قورلايتىن قارىم-قاتىناس، ازاپتاۋلار" بابىمەن ايىپتى دەپ تانىپ، ارقايسىسىنا 4 جىلعا شارتتى تۇردە باس بوستاندىعىنان ايىرۋ جازاسىن تاعايىندادى. سونداي-اق ولار جابىرلەنۋشى تاراپقا شامامەن مورالدىق شىعىن رەتىندە 4,5 ميلليون تەڭگە وتەماقى تولەۋگە مىندەتتەلدى، دەلىنگەن حابارلامادا.
ال پروكۋرور سوتتان قاناقىنوۆ پەن اعزاموۆتى 6 جىلعا تۇرمە جازاسىنا كەسۋدى سۇراعان.
سونداي-اق، سوت كەزىندە كورسەتىلگەن ۆيدەودا پوليتسەيلەردىڭ ارەڭ قوزعالىپ جاتقان جوتاباەۆتى تەپكىلەپ جاتقانى كورىنەدى. دەگەنمەن، ايىپتالۋشى پوليتسەيلەر سوتتا وزدەرىنە تاعىلعان ايىپتى مويىندامادى. ولار كۇش قولدانۋ ارەكەتى بار بولعانى قىزمەتتىك مىندەتتى ورىنداۋ اياسىندا عانا جۇرگىزىلگەنىن ايتىپ اقتالدى.
سوتتالۋشىلاردىڭ جاسى نەبارى 23 جانە 27 جاستا.
ەسكە سالا كەتسەك، جاندوس جوتاباەۆ قاڭتار وقيعاسى كەزىندە ميتينگكە قاتىسقانى ءۇشىن قاماۋعا الىنعان. ءىس ماتەريالدارىنا سايكەس، 36 جاستاعى جوتاباەۆ 2022 جىلى 17 قاڭتاردا ۋاقىتشا ۇستاۋ يزولياتورىندا كوز جۇمعان. ول 6 قاڭتاردا ۇستالعان ەدى. مەديتسينالىق ساراپتاما كەزىندە جوتاباەۆتىڭ 11 قابىرعاسى سىنعانى، وكپەسىنىڭ ءىسىپ كەتكەنى انىقتالعان. 10 كۇننەن كەيىن ول قايتىس بولدى.
