تۇركىستان وبلىسىنا قاراستى قازىعۇرت اۋدانىنىڭ ىشكى ساياسات ءبولىمى "ەلباسى جولداۋىن" جايدارمان ارقىلى وقۋشىلارعا ناسيحاتتاماق، - دەپ حابارلايدى "ادىرنا" ۇلتتىق پورتالى goszakup.gov.kz cايتىنا سىلتەمە جاساپ.
قازىعۇرت اۋدانىنىڭ ىشكى ساياسات ءبولىمى 2023 جىلدىڭ 30 مامىرى كۇنى قۇنى 4 500 000 تەڭگە بولاتىن "ەلباسى جولداۋىن" ناسيحاتتاۋعا باعىتتالعان تەندەر جاريالاعان. ىشكى ساياسات ءبولىمى ەلباسىنىڭ جولداۋىن بىلاي قويىپ، ەلباسى ستاتۋسىنىڭ دا ءبىرجولا الىنىپ تاستالعانىن ۇمىتىپ كەتسە كەرەك. ءتورت لوتتان تۇراتىن تەندەردىڭ ءبىرىنىڭ عانا جەڭىمپازى انىقتالىپ، جوبانى جۇزەگە اسىرۋ ءىسى جەرگىلىكتى ارداگەرلەر ۇيىمىنا بەرىلگەن.
4 شىلدە كۇنى قالعان لوتتار قايتادان 2 800 000 تەڭگەگە باعالانىپ، goszakup.gov.kz cايتىنا قويىلعان. قازىر جەڭىمپازدىڭ كىم بولاتىنى انىقتالۋدا.
"قازىعۇرت اۋدانى كولەمىندە ءدىني تۇراقتىلىقتى قامتاماسىز ەتۋ باعىتىندا ءىس-شارالار ۇيىمداستىرۋ، ەلباسى جولداۋىن ناسيحاتتاۋ، "سىبايلاس جەمقورلىقتىڭ الدىن الۋ" بويىنشا شارالارىن ۇيىمداستىرۋ" دەگەن ۇزاق تاقىرىپپەن جاريالانعان ەكى تەندەردىڭ دە تەحنيكالىق سيپاتتاماسىندا ەسكى قازاقستاندا قالعان ەلباسىنىڭ جولداۋىنا قاتىستى ەشتەڭە ايتىلماعان. ونىڭ ورنىنا قازىرگى پرەزيدەنتىمىز قاسىم-جومارت توقاەۆتىڭ بيىلعى جىلى جاريالاعان جولداۋىنا ارنالعان ارنايى 500 دانا كىتاپشا جاساتۋ، اقپاراتتىق كىتاپشانى كەزدەسۋلەر بارىسىندا تاراتۋ، بيلبورد جاساتۋ، "مەملەكەتتىك ءتىل - تاۋەلسىزدىگىمىز" تاقىرىبىندا اۋداندىق گازەتكە كەم دەگەندە 2 ماقالا جاريالاۋ، ت.ب بىرنەشە ۇساق-تۇيەك جۇمىستاردىڭ اتقارىلۋ كەرەكتىگى كورسەتىلىپتى.
ەڭ قىزىعى سول، ىشكى ساياسات ءبولىمى جولداۋدى مەكتەپ وقۋشىلارىنا ناسيحاتتاماق نيەتتەرى بار كورىنەدى. ەسكى قازاقستاندا قالىپ كەتكەن "ەلباسى" اتاۋىن جاڭا قازاقستاننىڭ تەندەرىنە تاقىرىپ ەتكەندەر "پرەزيدەنت جولداۋىن قولداۋ، مەملەكەتتىك ءتىل تۇعىرىمىز" تاقىرىبىندا مەكتەپ وقۋشىلارى اراسىندا «جايدارمان» ويىنىن وتكىزۋدى دە جوسپارلاپ وتىر ەكەن.
تەحنيكالىق سيپاتتامادا پرەزيدەنت جولداۋىن ناسيحاتتايتىن جايدارمان ويىندارىنا كەمى 10 كوماندا قاتىسۋى كەرەكتىگى تايعا تاڭبا باسقانداي كورسەتىلگەن.
ءبىزدىڭ كوكەيىمىزدە "مەكتەپ وقۋشىلارى اراسىندا وتەتىن جايدارماننىڭ جولداۋعا قانداي قاتىسى بار؟" دەگەن سۇراق تۇر. بۇل سۇراقتى رەسمي حاتپەن قازىعۇرت اۋدانىنىڭ ىشكى ساياسات بولىمىنە جولدادىق. ءبىز جولداعان سۇراققا قازىعۇرتتىقتار جاۋاپ بەرىپ جاتسا، ونى دا پورتالىمىزعا جاريالايتىن بولامىز.
قانات بىرلىكۇلى،
"ادىرنا" ۇلتتىق پورتالى
