“قازاقمىس” كومپانياسىنىڭ ەرەۋىلگە شىققان كەنشىلەرى جۇمىسىن جالعاستىرادى، دەپ حابارلايدى “ادىرنا” ءتىلشىسى كومپانيانىڭ ءباسپاسوز قىزمەتىنە سىلتەمە جاساپ.
2023 جىلدىڭ 14 تامىزىندا تۇنگى اۋىسىمعا تۇسكەن ساتباەۆ وندىرىستىك ۋچاسكەسىنىڭ №65 شاحتاسىندا بىرنەشە كەنشىلەر مەن مەردىگەر ۇيىمداردىڭ جۇمىسشىلارى جۇمىستى توقتاتاتىنى تۋرالى حابارلاپ، ەرەۋىلگە شىققان بولاتىن. ارتىنشا ۇلىتاۋ وڭىرىندە ەرەۋىلگە شىققان جۇزدەن استام كەنشى 15 تالاپ قويعان.
ولار ەڭبەك جاعدايىن جاقسارتۋدى، جۇمىسشىلاردىڭ ەڭبەك ءوتىلىن ەسەپكە الۋدى، ەسكى تاۋ-كەن جابدىقتارىن كونديتسيونەرى بار جاڭا قوندىرعىلارعا اۋىستىرۋدى سۇرايدى. مۇگەدەكتىك پايىزىن 29-دان 50 پايىزعا دەيىن ارتتىرۋ، جاقىندا قايتىس بولعان جۇمىسشى ە. ەربوسىنوۆتىڭ ۇلىن جۇمىسقا الۋ مەن قولدا بار بارلىق اقشالاي سىياقىلاردى بەرۋدى تالاپ ەتكەن.
سونىمەن قاتار، نارازىلىق بىلدىرۋشىلەر ەرىكتى مەديتسينالىق ساقتاندىرۋ شارتتارىن قايتا قاراۋدى تاعى بىرنەشە ماسەلەلەردى قاراستىرۋدى سۇرادى.
ەرەۋىلشىلەرگە «قازاقمىس» كومپانياسىنىڭ باسشىلىعى، پروكۋراتۋرا قىزمەتكەرلەرى، جەرگىلىكتى اتقارۋشى بيلىك وكىلدەرى اتتاندى كومپانيا باسشىلىعى تۋىنداعان ماسەلەلەردى شەشۋ ءۇشىن كەنشىلەردىڭ باستاماشىل توبىمەن كەلىسسوزدەر جۇرگىزىپ، ءبىر مامىلەگە كەلگەن.
كەنشىلەردىڭ كەيبىر سۇراقتارى شاحتادا كەلىسىلىپ، قاناعاتتاندىرىلدى. كوتەرىلگەن ماسەلەلەردىڭ ەكىنشى بولىگىنىڭ ورىندالۋى زاڭنامالىق وزگەرىستەرگە قاتىستى بولعان. سول سەبەپتى ولاردى شەشۋ ءۇشىن قوسىمشا ۋاقىت قاجەت. ولاردى قىزمەتكەرلەر مەن جۇمىس بەرۋشى وكىلدەرىنەن تۇراتىن ارنايى قۇرىلعان باستاماشى توپ پىسىقتايتىن بولادى.
كەلىسسوزدەر ناتيجەسىندە كاسىپورىنداردا جۇمىس جالعاسۋدا. سونداي-اق ەرەۋىلگە شىققان كەنشىلەردىڭ تارتىپتىك جاۋاپكەرشىلىككە تارتىلمايتىنى ايتىلدى.
ۇقساس جاڭالىقتار
