وسى جىلدىڭ قاڭتار، اقپان، ناۋرىز ايىندا كرەديت العان بولساڭىز، ونى دا كىرىس دەپ ەسەپتەيدى
كوپ بالالى انالار پرەزيدەنت ۋادە ەتكەن 21 مىڭ تەڭگەدەن ءۇمىتتى. الايدا اۋىلداعى كەدەيدىڭ بالاسى اكەسى كولەڭكە بولسىن دەپ ەككەن اعاشتىڭ كەسىرىنەن جاردەماقىدان قاعىلىپ جاتىر، دەپ حابارلادى ەۋرازيا ءبىرىنشى ارناسى.
"ەرەجەدە بارلىعى جازىلعان. مىسالى بۇزاۋدى الاتىن بولساق، 1-2 جاسقا دەيىن ەسەپكە الىنبايدى. جاڭا ەگىلگەن اعاشتار دا ءونىم بەرگەنشە ەسەپتەلمەيدى", - دەپ ءتۇسىندىردى قر ەڭبەك جانە حالىقتى الەۋمەتتىك قورعاۋ مينيسترلىگىنىڭ باس ساراپشىسى عاليا جاباعينا.
بۇزاۋ ەسەپكە الىنباعانىمەن، ماما سيىر كىرىس اكەلۋشى بولىپ ەسەپتەلەدى. ەگەر ءبىر جاسقا دەيىنگى بالا كۇتىمىنە بايلانىستى جاردەماقى الىپ وتىرساڭىز، ول وتباسىنىڭ تابىسىنا جاتادى. مۇگەدەك بالانى باعىپ وتىرعانعا بەرىلەتىن جاردەماقىنى دا كىرىس دەپ ەسەپتەپ قويعان. وسى جىلدىڭ قاڭتار، اقپان، ناۋرىز ايىندا كرەديت العان بولساڭىز، ونى دا كىرىس دەپ ەسەپتەيدى.
"كوپ جاعدايدا كرەديتتى پايدا كورۋ ءۇشىن الادى. بىراق كرەديتتىڭ بارلىق سوماسى جيىنتىق تابىسقا جاتپايدى. سوڭعى ءۇش ايدا تولەنەتىن سوماعا عانا ەسەپتەلەدى. ول كىسى وسى اقشانى الار بۇرىن بانككە تولەۋگە قابىلەتتى ەكەنىن دالەلدەيدى عوي", - دەيدى عاليا جاباعينا.
21 مىڭعا نيەتتى بولساڭىز، كرەديت بولماۋى كەرەك. سوسىن اجىراسپاڭىز. كۇيەۋىڭنەن اليمەنت الاسىڭ دەپ ءار بالاڭىزعا 21 مىڭدى قيماي قويۋى مۇمكىن. زەيەتكەر اتا-اجەڭىز بولسا، الگى اتاۋلى كومەكتى كورمەي كەتۋىڭىز مۇمكىن. كىرىس-شىعىستاردى وسىلاي ەسەپكە الماعاسىن تالاي كەلىنشەك جاردەماقىدان قاعىلىپ جاتىر.
