پاۆلوداردا كۇيەۋىن پىشاقتاپ ولتىرگەن جۇكتى ايەلگە قاتىستى سوت وتىرىسى باستالدى. قىلمىس قاساقانا كىسى ءولتىرۋ رەتىندە قاراستىرىلىپ جاتىر. بىراق سوتتالۋشى بۇل نۇسقامەن كەلىسپەدى. بۇل تۋرالى كتك ارناسى جاريالادى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، وقيعا مامىر ايىندا بولعان. مارقۇم دوسىمەن بىرگە ەكىباستۇزداعى ءوزى جۇمىس ىستەگەن بالاباقشادا ىشىمدىك ءىشىپ وتىرعان. ال جانجال قىزعانىشتان باستالعان. ايەلدىڭ ايتۋىنشا، كۇيەۋى الدىمەن ۇرىپ، كەيىن شىعىپ كەتكەن. ال قايتىپ كەلگەندە قولىنا پىشاق الىپ، ايەلىن ولتىرەتىنىن ايتقان.
قاساقانا ارەكەت ەتىپ، وڭ قولىنداعى پىشاعىن قىلمىس قارۋى رەتىندە قولدانعان ول سول جاق جاۋىرىنى ماڭىنا سوققى جاساعان. سالدارىنان ەر ادام وقيعا ورنىندا جان تاپسىردى، – دەدى مەملەكەتتىك ايىپتاۋشى اسەمگۇل يستاەۆا.
ال ايەل كۇيەۋىنىڭ قولىنان پىشاقتى الىپ، باسپالداققا جۇگىرگەنىن ايتادى. ونى كۇيەۋى تومەن قاراي قۇلاتىپ جىبەرمەك بولعاندا پىشاقپەن سوققى جاساعان. ەندى 30 جاستاعى ايەل ارەكەتىن ءوزىن-ءوزى قورعاۋ دەپ قاراستىرۋدى سۇرايدى.
ساراپتامالاردىڭ بارلىعى جاسالدى، جاعداياتتىق ساراپتاما مۇنى ءوزىن-ءوزى قورعاۋ دەپ تانىدى. بىراق نەلىكتەن باس تارتقانىن بىلمەيمىن. ساراپتاما مەنىڭ جاعىمدا، ياعني مەن ءوزىمدى جانە بولاشاق بالامدى قورعادىم. بىراق پروكۋراتۋرا باس تارتىپ وتىر، – دەدى ايىپتالۋشى اسەم الىمباەۆا.
ايتا كەتەيىك، بۇعان دەيىن تۇركىستان وبلىسىندا ايەل جوعالىپ كەتكەن كۇيەۋىن ءولتىردى دەگەن كۇدىككە ىلىنگەنىن حابارلاعان ەدىك.
